تەقینەوەی گەورە لە کەنداو؛ ئێران چەک و هێزی تایبەت دەهێنێتە سەر سنووری هەرێم

لە کاتێکدا کەنداوی عەرەبی و گەرووی هورمز شاهیدی پێدادانی ڕاستەوخۆ و گەمارۆیەکی دەریایی توندی نێوان واشنتۆن و تارانن، سنوورەکانی هەرێمی کوردستان دەبنە هێڵی نوێی گرژییەکان. بەپێی زانیاریی تایبەتی "ئیرادە" کە لە سەرچاوەیەکی ناو هێزە کوردییەکانی ڕۆژهەڵاتەوە دەستی کەوتووە، سوپای پاسداران هێزێکی تایبەتی 3000 کەسیی ناردووەتە سەر سنوورەکان. ئۆپۆزسیۆنی کوردیش ئەم جووڵە بێپێشینەیەی تاران وەک ئامادەکارییەک بۆ شەڕێکی زەمینی دەبینێت لە حاڵەتی پەرەسەندنی زیاتری ململانێکانی نێوان ئەمریکا و ئێراندا.

سەرچاوەیەکی تایبەت لە هێزە کوردییەکانی رۆژهەڵات قسەی بۆ "ئیرادە" کرد و وتی "ئاگاداری وردەکاریی جوڵەی هێزەکانی ئێرانین".

وتیشی " ئەوان بە چڕی و لە نزیکەوە چاودێری هەموو جموجۆڵەکانی سوپای پاسداران دەکەن".

قەبارە و جۆری هێزەکە

ئەو هێزانەی لە چەند هەفتەی ڕابردوودا بە چەند قۆناغێک هێنراونەتە سەر سنوور، نزیکەی 3000 چەکداری یەکەی تایبەتی "سابیرین" لەخۆدەگرن (کە هێزێکی هەڵبژێردراو و توندڕەوی ناو سوپای پاسدارانن)، لەگەڵ یەکەگەلێک لە هێزە زەمینییەکان و هێزی ئاسمانی-فەزایی سەر بە سوپای پاسداران.

پلان و سنوورەکان: سەرچاوەکە ئاماژەی بەوەش کردووە کە ئەم هێزانە تا ئێستا سنووری هەرێمی کوردستانیان نەبەزاندووە و هێشتا بە تەواوی ڕوون نییە نیازی کۆتاییان چییە، بەڵام ئامادەکارییەکان لە ئاستێکی زۆر بەرزدان.

ئۆپۆزسیۆنی کوردی؛ بەڵگەنامەکردنی چەکە قورسەکان و تەکنەلۆژیای ڕووسی

هاوشانی زانیارییەکانی سەرچاوەکەی "ئیرادە"، تیمەکانی چاودێری سەر بە پارتە کوردییەکان بڵاوبوونەوەی چەندین جۆر چەکی قورسیان بەدۆکیۆمێنت کردووە:

زرێپۆش و تانک: تانکی پێشکەوتووی جۆری "زولفەقار" و "T-72"ی نوێکراوە.

سیستمی موشەکی و درۆن: سەکۆکانی هاوێشتنی موشەکی بالیستی "عیماد" و "فاتیح"، لەگەڵ فڕۆکە بێفڕۆکەوانەکانی جۆری "شاهد"، "مۆهاجیر" و "مێعراج" کە ڕۆژانە گەشتی هەواڵگری بەسەر ناوچە سنوورییەکاندا دەکەن.

ئەفسەر و ڕاوێژکارانی ڕووسی: ئۆپۆزسیۆن دەڵێت سیستەمەکانی سیخوڕی، جەمکردن (تێکدانی درۆنەکان) و تێکدانی پەیوەندییە مانگە دەستکردەکان لە ناو بارهەڵگری تایبەتدا جێگیرکراون و لەلایەن ئەفسەر و ڕاوێژکارانی ڕووسییەوە بە شێوەیەکی ڕاستەوخۆ سەرپەرشتی دەکرێن، کە تاران لە ماوەی دوو ساڵی ڕابردوودا لە مۆسکۆی کڕیون.

بەرپرسانی ئەم پارتانە پێیان وایە ئەم پێکهاتە سەربازییە لە ڕێوشوێنی ئاسایی پاراستنی سنوور تێپەڕ دەبێت. عەلی خۆشنمەک، سەرکردە لە کۆمەڵەی شۆڕشگێڕی زەحمەتکێشانی کوردستان بە "ئەلحوڕە"ی ڕاگەیاندووە کە سوپای پاسداران خۆی بۆ شەڕی زەمینی ئامادە دەکات. لەلایەکی ترەوە، خەلیل نادری وتەبێژی پارتی ئازادیی کوردستان (پاک) ڕایگەیاندووە کە سەرەڕای بەردەوامیی هێرشەکانی ئێران (کە دواترینیان کوژرانی ٦ پێشمەرگەی حدکا لە پیرانشار و شوانێکی گەنج بوو لە سیدەکان)، هێشتا هاوپەیمانیی پارتە کوردییەکان بڕیاری کۆتاییان بۆ دەستپێکردنی ڕووبەڕووبوونەوە لە ناوخۆی ئێران نەداوە، بەڵام ئێستا بە گونجاوترین دەرفەت دەبینن بۆ کارێکی وا.

بەرەی باشوور؛ گەمارۆی ئەمریکا و جەنگی ڕاستەوخۆ لە کەنداو

ئەم جووڵە سەربازییانەی سەر سنووری هەرێم، ڕاستەوخۆ بەستراونەتەوە بەو شەڕە گەورەیەی کە لە باشووری ئێران و ئاوەکانی کەنداو دەستی پێکردووە.

هێرشە ئاسمانییەکانی ئەمریکا

 فەرماندەیی ناوەندی سوپای ئەمریکا ڕایگەیاند کە بە تەقەمەنی ورد پێگە سەربازییەکانی ئێرانی لە شارە کەناراوییەکانی وەک بوشەهر، جاسک، کۆنارک، ئەبو موسا و بەندەر عباس کردووەتە ئامانج بۆ لێدانی سەکۆکانی درۆن و موشەک.

لەلایەن خۆشیەوە، هێزی دەریایی ئەمریکا ڕایگەیاند گەمارۆیەکی گشتگیری دەریایی بەسەر سەرجەم بەندەر و وێستگەکانی هەناردەکردنی نەوتی ئێراندا دەسەپێنێت، ئەمەش هاتوچۆی کەشتیوانی لە گەرووی هورمز بە تەواوی ڕاگرتووە.

وەڵامەکەی ئێران

سوپای پاسداران بنکە و کەشتییەکانی ئەمریکای لە بەحرەین و ئوردن کردووەتە ئامانج و دەنگی تەقینەوەی بەهێز لە بەندەرە کەناراوییەکانی ئێران بیستراوە.

جەنگی دەروونی لە نێوان تاران و واشنتۆن

پەرەسەندنەکان ڕەهەندێکی سیاسی و جەنگی دەروونیشیان بەخۆوە گرتووە، دوای ئەوەی دۆناڵد ترەمپ ڕایگەیاند ئەمریکا پاسەوانی گەرووی هورمز دەکات و باجی 20٪ دەسەپێنێت، عەباس عێراقچی، وەزیری دەرەوەی ئێران بە تەنزەوە وتی: "سەرۆکی ئەمریکا ڕاست دەکات، هەرکەس ئاسایش دابین بکات دەبێت قەرەبوو بکرێتەوە، بەڵام ئێران پاسەوانی هەمیشەیی گەرووەکەیە 20٪ زۆرە و ئێمە دادپەروەر دەبین و کەمتر وەردەگرین!"

هاوکات، ئیبراهیم عەزیزی، سەرۆکی لیژنەی ئاسایشی نیشتمانی لە پەرلەمانی ئێران داوای لە ئەمریکییەکان کرد واز لە شانازیی پووچ بهێنن و ئاماری ڕاستەقینەی زیانەکانیان ئاشکرا بکەن.

دەرئەنجام

داتاکان و پێشهاتە مەیدانییەکان نیشانی دەدەن کە هەرێمی کوردستان لەبەردەم تاقیکردنەوەیەکی ئەمنی قورسدایە. لێدوانە تایبەتەکانی سەرچاوەکەی "ئیرادە" سەبارەت بە جێگیرکردنی هەزاران چەکداری یەکەی تایبەتی "سابیرین" شانبەشانی چەکە قورسەکان، ئاماژەیەکی ڕوونە بۆ ئەوەی کە تاران دەیەوێت هەرێمی کوردستان وەک کارتێکی فشاری سەربازی بەکاربهێنێت بۆ کەمکردنەوەی ئەو گەمارۆ دەریایی و ئاسمانییە توندەی کە ئەمریکا لە باشوورەوە بەسەریدا سەپاندووە. لەم هاوکێشەیەدا، خاک و ئاسایشی هەرێم کەوتووەتە ناو ناوەندی ئاگری ململانێکەوە.