پەرلەمانی عێراق سەرقاڵی داڕشتنی یاسایەكی نوێیە بۆ بەرەنگاربوونەوەی تیرۆر

پەرلەمانی عێراق هەنگاوە یاساییەکانی بۆ داڕشتن و ڕێکخستنەوەی پڕۆژەیاسایەکی نوێی بەرەنگاربوونەوەی تیرۆر دەستپێکردووە، بە ئامانجی توندکردنی سزا ڕێکارییەکان و بەرفراوانکردنی پێناسەی تاوانە تیرۆریستییەکان، دوای ئەوەی پڕۆژەکە قۆناغی خوێندنەوەی یەکەمی لە ئەنجومەنی نوێنەران تێپەڕاند.

بەپێی ڕوونکردنەوەکانی محەمەد جاسم خەفاجی، ئەندامی لیژنەی یاسایی لە پەرلەمانی عێراق، پڕۆژەیاسا نوێیەکە بەراورد بە یاسای پێشوو بە شێوازێکی زۆر فراوانتر و وردتر داڕێژراوە. پڕۆژەکە پێناسەیەکی تێروتەسەل بۆ تاوانی تیرۆریستی دەخاتە ڕوو و مەودای چەمکەکە تێپەڕ دەبات بۆ ئەوەی ئەو کردە و کەرتە نوێیانەش بگرێتەوە کە لە ياكاری پێشوودا ڕەنگیان نەدابووەوە.

لەلایەکی دیکەوە، یاسا پێشنیازکراوەکە پێکهاتەیەکی سزایی پلە بە پلە و توندی لەخۆگرتووە کە بەپێی قورسیی تاوانەکە پۆلێن دەکرێن؛ سزاكان لە لەسێدارەدان و زیندانیکردنی هەتاهەتایی و کاتییەوە دەستپێدەکەن، تا دەگاتە سەپاندنی سزای دارایی و کەمکردنەوەی مافە مەدەنییەکان.

یەکێک لە گرنگترین نوێکارییە ئیداری و یاساییەکانی ئەم پڕۆژەیە، هێنانەکایەی سیستەمێکە بۆ ئامادەکردنی "لیستی تیرۆریستان". بەپێی ئەم میکانیزمە، داواکاری گشتی بەرپرسیارێتیی تۆمارکردنی ناوی سەرپێچیکاران و تۆمەتباران دەگرێتە ئەستۆ لەو لیستەدا. تۆمارکردن لەم لیستەیەدا ڕاستەوخۆ دەبێتە هۆی بێبەشکردنی کەسی تۆمارکراو لە مافە بنەڕەتییەکان، لەوانەش: قەدەغەکردنی گەشتکردن بۆ دەرەوەی وڵات، دەستبەسەرداگرتن یان ڕەتکردنەوەی پێدانی پاسپۆرت، و بێبەشکردن لە دەرفەتەکانی کارکردن لە کەرتە گشتی و تایبەتەکاندا.

هاوکات لەگەڵ ئەم ڕێکارە یاساییانەدا، لیژنەی ئاسایش و بەرگری لە پەرلەمان بەرنامەرێژی دەکات بۆ ئەنجامدانی زنجیرەیەک میوانداریکردن و کۆبوونەوەی ڕاوێژکاری بە مەبەستی ڕاڤەکردن و یەکلاییکردنەوەی چوار دۆسیەی جەوهەری کە پەیوەستن بە ناوەرۆکی یاساکەوە.

لە ئێستادا دەرگای هەموارکردن و پێشکەشکردنی تێبینی لەبەردەم فراکسیۆنە سیاسییەکان و لیژنە پسپۆڕەکان کراوەیە. بڕیارە دوای ئەنجامدانی خوێندنەوەی دووەم و کۆکردنەوەی پێشنیارە فەرمییەکان، دەقە کۆتاییەکەی پڕۆژەیاساکە بۆ دەنگدان لە کۆبوونەوەکانی ئەنجومەنی نوێنەراندا ئامادە بکڕێت.