ئەمڕۆ مووچەى ئەم شوێنانە دەدرێت

ناوەندی هەواڵ

دابەشكردنی مووچەى مانگى ئەیلوول بەردەوامە و بەگوێرەى ئەو خشتەیەش کە وەزارەتى دارایى و ئابورى هەرێم بڵاویکردووەتەوە ئەمڕۆش سێ وەزارەت و چەند دەستەیەک مووچە وەردەگرن.

وەزارەتی دارایی و ئابووری لە راگەیەندراوێکدا بڵاویکردەوە، لەگەڵ ئەوەی ئەمڕۆ دووشەمە لە هەریم پشووە، بەڵام بانکەکان بەڕووىمووچە خۆراندا کراوەن و دابەشکردنی مووچە بەگوێرەى خشتەی راگەیەندراو بەردەوام دەبێت و دەوامی سەرجەم ئەو بانکانە ئاسایی دەبێت کە ئەرکی دابەشکردنی مووچەیان لە ئەستۆدایە.

پێشتر وەزارەتى دارایى بڵاویکردەوە، بۆ ئەمڕۆ دووشەممە مووچەى هەریەک لە وەزارەتەکانى کاروباری شەهیدان و ئەنفالکراوان، تەندروستی و دارایی دەستەکانى وەبەرهێنان و ژینگە، دەزگای مین، ناوچەکانی دەرەوەی هەرێم، کۆمیسیۆن، دیوانی چاودێری و مافی مرۆڤ دابەشدەکرێت.

بانكەكان ئاگادارییان بڵاوكردووەتەوە، جگە لە دابەشكردنی مووچەی ئەو شوێنانە، بەردەوام دەبن لە دابەشكردنی مووچەی خانەنشینان و زیندانییانى سیاسی، كەسوكاری شەهیدان و ئەنفالکراوان و خاوەن پێداویستییە تایبەتەكان.