ئایدن مەعروف: داوا دەکەین زمانی تورکمانی بکرێتە زمانێکی فەرمی

ناوەندی هەواڵ

وەزیری ھەرێم بۆ کاروباری پێکھاتەکان ڕایگەیاند،"تورکمان لە عێراق سێیەم نەتەوە و لە ھەرێمی کوردستان دووەم نەتەوەیە، داوا دەکەین زمانی تورکمانی بکرێتە زمانێکی فەرمیی لە پاڵ زمانی عەرەبی و کوردییدا".

ئایدن مەعروف،وەزیری ھەرێم بۆ کاروباری پێکھاتەکان بەبۆنەی ڕۆژی زمان و کولتووری تورکمان، لە کۆنگرەیەکی ڕۆژنامەوانییدا دوای پیرۆزبایی ڕۆژی زمان و کولتووری تورکمانی لە تورکمانەکان و سەرجەم پێکھاتەکان وتی: "ئەم ڕۆژە بۆ ئێمە گرنگە، لەم ڕۆژەدا لە ساڵی 1993 یەکەم قوتابخانەی تورکمانی بە ناوی دۆغوش لە ھەولێر کرایەوە و ئەمەش پاڵپشتییەک بوو بۆ پەرەپێدانی زمان و کولتووری تورکمانی".

ئایدن مەعروف وتیشی: "لە ئێستادا نەتەوەی تورکمان فاکتەرێکی گرنگن و ھەموو کات پاڵپشت بوون بۆ ڕەخساندنی زەمینەسازیی پێکەوەژیان لە عێراق و ھەرێمی کوردستان، ھەر بۆیە داوا لە ھەموو لایەک دەکەین کە ئەم ڕۆژە بکرێتە بۆنەیەکی فەرمی، بەھۆی ئەوەی پێکھاتەی تورکمان لە عێراق سێیەم نەتەوە و لە ھەرێمی کوردستان دووەم نەتەوەیە، داوا دەکەین زمانی تورکمانی بکرێتە زمانێکی فەرمی لە پاڵ زمانی عەرەبی و کوردییدا".