جێگری پارێزگای سلێمانی بۆ تەوتینی مووچە نووسراوێك ئاڕاستەی بانكی ناوەندی دەكات

ناوەندی هەواڵ

جێگری پارێزگای سلێمانی بە نووسراوێكی فەرمی داوا لە بانكی ناوەندیی عێراق دەكات پڕۆسەی بەبانکیکردنی مووچەی مووچەخۆرانی پارێزگاكە دەستپێبكات.

لە نووسراوێكی فەرمیدا كە ڕۆژی 4ی ئەم مانگە بە واژۆی شاهۆ عوسمان، جێگری پارێزگاری سلێمانی بۆ كاروباری كارگێڕی، ئاڕاستەی بانكی ناوەندیی عێراق كراوە، داوا لە بانكەكە دەكات بە پستبەستن بە ڕێكارە كارپێكراوەكان و بڕیارەكەی دادگای فیدڕاڵی، بەبانکیکردنی مووچەی مووچەخۆرانی پارێزگای سلێمانی دەستپێبكەن.

لە نووسراوەكەدا هاتووە، "بە پشتبەستن بە بڕیارەكەی دادگای فیدڕاڵی لە مانگی شوباتی ئەمساڵدا تایبەت بە بەبانكیكردنی مووچەی مووچەخۆرانی هەرێم، داوا لە بانكەكەتان دەكەین، ڕێكارە پێوستەكانی تایبەت بەو پڕۆسەیە لە پارێزگای سلێمانی دەستپێبكەن".

پێشتر لە مانگی شوباتی ئەمساڵدا دادگای باڵای فیدڕاڵی عێراق لە بڕیارێکدا ڕایگەیاند، پێویستە مووچەی مووچەخۆرانی هەرێم بەبانكی بكرێت و ڕاستەوخۆ لەلایەن بانكە فیدڕاڵییەكانی عێراقەوە مووچەكانیان بۆ بخرێتە سەر هەژمارەكانیان، هاوكات ماوەیەكی دیاریكراویشیان دایە حكومەتی هەرێم كە پڕۆسەی بەبانكیكردنەكە تەواو بكات، بەڵام تا ئێستا گفتوگۆی ئەو پرسە لەنێوان لایەنەكاندا بەردەوامە و هێشتا پڕۆسەی بەبانكیكردن لەلایەن بانكەكانی عێراقەوە بۆ مووچەی مووچەخۆرانی هەرێم دەستی پێ نەکردووە.