هەڵوێستی ئەمریکاو بەریتانیاو ئەڵمانیا ئەوروپا لەبارەی بانگەوازەكەی ئۆ*جەلان

ناوەندی هەواڵ

ئەمریکاو ئەڵمانیا و بەریتانیاو ئەوروپا پێشوازیی لە پەیامی ئۆ*جە-لان دەكەن و  سكرتێری نەتەوەیەكگرتوەكانیش بە تروسكایی هیوا لە باكوری كوردستان و توركیا ناوی دەهێنێت.

بەریتانیاو ئەڵمانیا بەجیا پێشوازی لە بانگەوازەكەی ئۆجە*لان دەكەن و ئەڵمانیا دەڵێت، بانگەوازەكە دەرفەتێكە بۆ گەیشتن بە چارەسەرێكی ئاشتیانەی هەمیشەیی بۆ پرسی كورد.

 وتەبێژی حكومەتی ئەڵمانیا رایگەیاند، ئۆلاف شۆڵتز، ڕاوێژكاری ئەڵمانیا پێشوازی لە بانگەوازەكەی ئۆجە*لان دەكات بۆ دانانی چەك و هەڵوەشاندنەوەی پەكەكە.

دەشڵێت، بانگەوازەكەی ئۆجە*لان دواجار خستنەڕوی دەرفەتێكە بۆ تێپەڕاندنی ئەو شەڕە سەختەی كە هەیە و گەیشتن بە پێشهاتێكی ئاشتیانەی هەمیشەیی بۆ پرسی كورد.

وتەبێژی حكومەتی ئەڵمانیا ئەوەشی خستۆتەڕو، كۆتاییهێنان بۆ توندوتیژی یەكەم هەنگاوی گرنگە بەڵام پێویستی بە هەنگاوی زیاتر هەیە بۆ گەیشتن بە چارەسەرێكی هەمیشە بۆ گەلی توركیا كە ئەوەش رێزگرتن و پشتیوانی لە مافە كولتوری و دیموكراسییەكانی كورد لەخۆدەگرێت.

لە لایەكی دیکەوە، ناچۆ سانچێز، پەرلەمانتار و ڕیپۆرتەری پەرلەمانی یەكێتی ئەوروپا ڕایگەیاند، بانگەوازەكەی ئۆجە*لان  سەرەتایەكی باشە بۆ چارەسەری پرسی كورد و چەكدادانان و هەڵوەشاندنەوەی پەكەكەش هەنگاوێكی مێژووییە.

هاوکات، وتەبێژی وەزارەتی دەرەوەی بەریتانیا ڕایگەیاند، پێشوازی لە بەرەوپێشچون روەو ئاشتی و ئاسایش بۆ گەلی توركیا دەكەین، هانی هەمو لایەنەكان دەدەین بەشداربن لە پڕۆسەیەكی ئاشتیانەو بونیادنەردا لەپێناو ئاسایش و سەقامگیری و رێزگرتن لە سەروەریی یاسا.

جەختیشی كردۆتەوە كە حكومەتی بەریتانیا پابەندە بە پشتیوانیكردنی ئەو هەوڵانەی دەبنە مایەی كەمكردنەوەی شەڕ و بەهێزكردنی سەقامگیری لە توركیا و هەروەها ناوچەكە بەگشتی.

لەهەمان کاتدا، نوسینگەی ئەنتۆنیۆ گۆتێرێس سكرتێری گشتی نەتەوە یەكگرتووەكان بڵاوی كردووەتەوە، گۆتیرێس پێشوازیی لە پەیامەكەی ئۆجە*لان كرد، هاوكات ئەو هەنگاوەش بە تروسكاییەكی هیوا وەسفیكردووە.

لەلایەکی دیکەوە، سەرۆکی پارتی گەلی کۆماری (جەهەپە) رایگەیاند، هیوادارن پەکەکە بانگەوازەکەی ئۆجەلان جێبەجێبکات، دەشڵێت، ''دەبێت پرسی کورد لە پەرلەمان چارسەربکرێت''.

 ئۆزگور ئۆزەل، سەرۆکی پارتی گەلی کۆماری (جەهەپە)، ڕۆژی پێنجشەممە، 27ی شوباتی 2025 لە تۆڕی کۆمەڵایەتیی ئێکس بڵاویکردەوە، ''لەگەڵ ئەوەداین، پرسی کورد لە پەرلەمانی تورکیا لەلایەن هەموو لایەنەکان شەفافانە تاوتوێ بکرێت و چارەسەر بکرێت.''

سەرۆکی جەهەپە باسی لەوەش کرد، ''پاڵپشتیی خۆمان بۆ چارەسەرکردنی هەموو کێشەکانی تورکیا بەشێوەیەکی دیموکراسی، دووپاتدەکەینەوە. هەمیشە دژی  تووندوتیژی بووین و لەمەودواش دژی دەبین''.

کۆشکی سپیش ڕایگەیادووە، پەیامەکەی ئۆجەلان یارمەتیدەر دەبێت بۆ هێنانەدی ئاشتی لە ناوچەکەدا.