ئەمەریکا هەڵوێستى لەسەر ڕێکەوتنەکەى دیمەشق و هەسەدە راگەیاند

ئیرادە میدیا

وەزیری دەرەوەی ئەمەریکا ڕایگەیاند، پێشوازی لە ڕێککەوتنی نێوان سوریا و هەسەدە دەکەن و چاودێریى جێبەجێکردنى بڕیارەکانى رێککەوتنەکە دەکەن.

مارکۆ روبیۆ، لە ڕاگەیەندراوێکدا دەڵێت، واشنتن پێشوازی لە ڕێککەوتنی نێوان دەسەڵاتی ڕاگوزەری سوریا و هێزەکانی سوریای دیموکرات "هەسەدە" لەبارەی یەکخستنی باکوور و رۆژهەڵاتی سوریا بە تەواوی وڵاتەکەوە دەکات بۆ سوریایەکی یەکگرتوو.

دەشڵێت، "بەردەوام دەبن لە چاودێرییکردنى ئەو بڕیارانەی دەسەڵاتی ڕاگوزەر دەریدەکەن و نیگەرانیشن لەو کردەوە توندوتیژانەی لەم دواییانەدا دژی پێکهاتەکان ئەنجامدران".

وەزیری دەرەوەی ئەمەریکا باسى لەوەشکردووە، ئەمریکا پشتگیریی خۆی بۆ گواستنەوەی دەسەڵات لە سوریا دووپات دەکاتەوە بۆ حکومڕانییەکى باوەڕپێکراو و دووربێت لە مەزهەبگەرایی، وەک ئەو دەڵێت، باشترین ڕێگەیە بۆ دوورکەوتنەوە لە ململانێ.

ڕۆژى دووشەممە، مەزڵوم عەبدی فەرماندەی هێزەکانی سوریای دیموکرات و ئەحمەد شەرع سەرۆکی سوریا بۆ قۆناغى ڕاگوزەر، ڕێککەوتنێکی هەشت خاڵییان واژۆکرد و بەگوێرەى رێککەوتنەکە، ئاگربەست لە تەواوی سوریا ڕادەگەیەندرێت.

بەپێی ڕێککەوتنەکە، دەبێت تا کۆتایی ئەمساڵ، خاڵەکانی ڕێککەوتنەکە لەلایەن لیژنە تایبەتمەندەکانەوە جێبەجێ بکرێت.