نوێنه‌ری ڕووسیا: ئه‌وه‌ی له‌ناوچه‌ كه‌ناراوییه‌كان ڕوویدا دووباره‌كردنه‌وه‌ی جینۆسایدی ڕواندا بوو

دوو سه‌رچاوه‌ی ئاگادار به‌ ڕۆیته‌رزیان ڕاگه‌یاندووه‌ كه‌ ڕووسیا له‌ كۆبوونه‌وه‌ داخراوه‌كه‌ی ئه‌م هه‌فته‌یه‌ی ئه‌نجومه‌نی ئاسایش له‌باره‌ی ئاژاوه‌ و شه‌ڕ و كوشتاره‌كانی ناو سوریاوه‌  -دوای بڵاوبوونه‌وه‌ی چه‌نده‌ها دیمه‌نی كوشتنی به‌كۆمه‌ڵی عه‌له‌وییه‌كان له‌ لایه‌ن چه‌كداره‌ جیهادییه‌ ئیسلامییه‌كانی سوریا و بیانییه‌كانه‌وه‌-، ڕه‌خنه‌ی توندی له‌ ده‌سه‌ڵاتدارانی نوێی سوریا گرتووه‌ و هۆشداری داوه‌ له‌ باڵاده‌ستبوونی جیهادییه‌كان له‌و وڵاته‌دا، هه‌روه‌ها به‌راوردی دۆخی ناوچه‌ كه‌ناراوییه‌كانی كردووه‌ له‌گه‌ڵ ئه‌و پاكتاوه‌ ڕه‌گه‌زییه‌ی كه‌ له‌ ( 1994 ) له‌ ڕواندا ڕوویداوه‌.

ڤاسیلی نیبینزیا نوێنه‌ری هه‌میشه‌یی ڕوسیا له‌ ئه‌نجومه‌نی ئاسایش گوتوویه‌تی: سه‌ره‌ڕای ئه‌وه‌ی كوشتاره‌كه‌ ئاشكرا بووه‌ به‌ڵام كه‌س ڕێگری لێ نه‌كردووه‌، نوێنه‌ره‌كه‌ی ڕووسیا پێی وابووه‌ هه‌ڵوه‌شاندنه‌وه‌ی سوپای سوریا هه‌ڵه‌ بووه‌، ئه‌مه‌شی ڕووده‌دات دووباره‌كردنه‌وه‌ی سیناریۆی عێراقی دوای ( 2003 )، هه‌روه‌ها جیهادییه‌كانی سوریا ڕۆڵێكی وێرانه‌كه‌رانه‌ ده‌بینن".

هه‌روه‌ك ئه‌و سه‌رچاوه‌ ئاگادارانه‌ ئه‌وه‌شیان ئاشكرا كردووه‌ كه‌ نوێنه‌رانی هه‌میشه‌یی هه‌ریه‌كه‌ له‌ وڵاتانی ئه‌مریكا و چین و فه‌ڕه‌نسا مه‌ترسی خۆیان له‌ بوونی جیهادییه‌ بیانییه‌كان له‌ سوریادا خستۆته‌ڕوو.

ڕه‌خنه‌ی توندی ڕووسیا له‌ فه‌رمانڕه‌وایانی ئێسته‌ی سوریا له‌ناو كۆبوونه‌وه‌ داخراوه‌كه‌ی ئه‌نجومه‌نی ئاسایش، پێدەچێت ناردنی په‌یامی ئەو وڵاتە بێت،‌ بۆ ئه‌ندامانی ئه‌نجومه‌نه‌كه‌ كه‌ ڕووسیا ده‌یه‌وێت باڵاده‌ستی خۆی به‌سه‌ر سیاسه‌تی سوریای پاش ئه‌سه‌ددا بهێڵێته‌وه‌، هاوکات سووره‌ له‌سه‌ر ئه‌وه‌ی پێگه‌ سه‌ربازییه‌كانی له‌ناوچه‌ كه‌ناراوییه‌كانی سوریادا بمێنێتەوە و ئامادە نیە پێگەکانی لەناوچە کەناراویەکانی سوریا چۆڵبکات بەو پێیەی ناوچەکە و پێگەکانی ڕووسیا بۆ ئایندەی ئەو وڵاتە گرنگی ستراتیژی هەیە لەبەر فراوانی ڕووبەرە ئاوییەکانی سوریا بەسەر دەریای ناوەڕاستەوە ‌.