هەفتەی داهاتو موچەی فەرمانبەرانی هەرێم خەرجدەکرێت

ئیخڵاس دلێمى ئەندامی لیژنەی دارایی لە پەرلەمانى عێراق لە لێدوانێكى رۆژنامەوانیى دا دوپاتیکردەوە، هەفتەی داهاتو موچەی فەرمانبەرانی هەرێمی کوردستان بۆ مانگی حوزەیران خەرج دەکرێت.

دلێمى، بە پلاتفۆرمی "ئەلجیبال"ی ڕاگەیاندوە، رێکكەوتن لە نێوان حکومەتی هەولێر و بەغدا سەبارەت بە دۆسیەی داهاتی نەوت و داهاتی نانەوتى و ناوخۆ کراوەو ئاماژەی بەوەشکردوە كە هەفتەی داهاتو موچەی مانگی شەشی فەرمانبەران دەنێردرێت، دوای ئەوەش لیستی موچەی مانگی تەمموز رەوانەى بەغدا دەكرێت.

دلێمى لە درێژەى لێدوانەكەى دا وتیشى: دوای ئەوەی حکومەتی هەرێمی کوردستان داواکارییەکانی پێشوی بۆ پشکێک لە بودجەی وەبەرهێنان و گەشەپێدان بۆ هەرێمەکان كەمكردەوە، کێشەی داهاتی نانەوتی چارەسەرکرا، كە ئەمەش هاوکاتە لەگەڵ بەردەوامی گفتوگۆکان سەبارەت بە دەستپێکردنەوەی هەناردەکردنی نەوت لە هەرێمی کوردستانەوە.

لەلایەكى ترەوە، فوئاد حسێن وەزیری دەرەوەی عێراق،  لە میانی دیدارێکى دا لەگەڵ ستیڤن ڤۆگان بەرپرسی کاروباری ئەمریکا لە عێراق، جەختی لە گرنگيی دەستپێکردنەوەی ئەم پرۆسەیە کردەوەو هەر لەو دیدارەشدا باس لە ڕۆڵی کۆمپانیا ئەمریکییەکان لە کەرتی وزە و ئەو کێشانەی کە ڕوبەڕویان دەبێتەوە لە هەرێمی کوردستان، كرا.