دەستەی مافی مرۆڤ سەردانی لاهور شێخ جەنگی کرد

ناوەندی هەواڵ

شاندێک لە دەستەی سەربەخۆی مافی مرۆڤ سەردانی لاهور شێخ جەنگی و بەشێک لە دەستگیرکراوەکانیان لەشاری سلێمانی کرد، گفتوگۆیان لەسەر ڕەوشی تەندروستی و شوێنی حەوانەوەیان کرد.

لەدوای ڕووداوەکانی هۆتێل لالەزار و دەسیگیرکردنی لاهوری شێخ جەنگی و بەشێک لە ئەندامانی هێزەکەی، بۆیەکەمجارە شاندێک لەدەستەی مافی مرۆڤ لەسجنی کانی گۆمە چاویان  بە لاهور شێخ جەنگی  کەوت و لە نزیکەوە گفتوگۆیان لەگەڵ کرد دەربارەی ڕەوشی تەندروستی و شوێنی حەوانەوەو ڕێکارەکان پرسیاریان ئاراستە کردووە.

دەستەی سەربەخۆی مافی مرۆڤ ڕایگەیاند، تەندروستی لاهوری شێخ جەنگی باشە و لەژورێکی تایبەت دانراوە تەواوی پێداویستییەکانی بۆ دابینکراوە، هاوکات بەڤیدیۆ لەگەڵ خێزانەکەی قسەی کردووە.

- ناوبراو داوای پەرتووکی لە ئاسایش کردبوو، کۆمەڵێک پەرتووکیان بۆ هێناوە.

- لەو کاتەی کەهاتووە بۆ زیندانی ئاسایش لەکانی گۆمە، ڕووبەڕووی هیچ توندوتیژی و ئەشکەنجەیەک نەبووەتەوە.

بەپێی ڕاگەیێنراوەکەی دەستەی سەربەخۆی مافی مرۆڤ، لاهور شێخ جەنگی داوای کردووە دۆسیەکەی بەڕێکاری یاسایی بڕوات و دەستەش چاودێری بکات.

تیمەکەی دەستەی سەربەخۆی مافی مرۆڤ وتیان، چاویان بە بەشێک لەدەستگیراوەکان کەوت کە وەک ئەندامی هێزەکەی لاهوور شێخ جەنگی ناسراون و بەپێی بەدواداچوونی شاندەکەی دەستە ژمارەیان 162 کەسن، ئاساییشی سلێمانی بە شاندی دەستەکەیان ڕاگەیاندووە، ژمارەی کوژراوەکانی هەردوو لا پێنج کەسن، ڕۆژانە ڕێگە بە بەشێک لەکەسوکاریان دراوە سەردانیان بکەن، ئێستا شوێنیان باشە و لەو کاتەی هێنراونەتە ئاسایش، ڕووبەڕووی هیچ توندوتیژییەک نەبوونەتەوە.

بەرەبەیانی ڕۆژی هەینی 22-8-2025، شەڕ و پێكدادانی سەخت لە هۆتێل لالەزار، لەنێوان هێزەكانی یەكێتی و لاهور شێخ جەنگی، سەرۆكی بەرەی گەل هەڵگیرسا و چەكی قورس و مامناوەند لە شەڕەكە بەكارهێنرا، لەئەنجامدا لاهور شێخ جەنگی و ژمارەیەکی زۆر لە چەکدارانی کە لەناو هۆتێلی لالە زاردابوون دەستگیرکران و ژمارەیەکیش کوژران و برینداربوون.