هێزێكى فراوانى ئه‌مریكا به‌ره‌و سوریا به‌ڕێكه‌وتوه‌

کاروانێکی گەورەی سەربازیی ئەمریکا لەعێراقەوە بەرەو ڕۆژئاوای کوردستان کشانەوە

بەپێی زانیارییەکانی پێگەی بەغداد ئەلیەوم کە پشتی بەسەرچاوەی ئاگادار بەستوە، ئه‌مڕۆ سێشەممە، کاروانێکی گەورەی هێزەکانی ئەمریکا لەبنکەی عەین ئەسەدەوە بەرەو سوریا کشاونەتەوە.

سەرچاوەکە  ڕاگەیاندوە کە "کاروانەکە دەیان بارهەڵگری بارکراو بەکەرەستەو پێداویستی جۆراوجۆری لەخۆگرتووە، لەبەشی باکووری بنکەکە لە ڕۆژئاوای ئەنبارەوە بەڕێکەوتووە بەئاراستەی ڕێگای نێودەوڵەتی بەرەو سنووری عێراق‌و سوریا".

هەروەک وتویەتی:"ئەم کاروانە پێنجەمین کاروانی لەمجۆرەیە لەمانگی ئابی ئەمساڵداو گەورەترینیشیانە کە لەمدواییانەدا تۆمارکرابێت، ئەمەش ئاماژەیە بۆ کشانەوەیەکی قۆناغ بەقۆناغی هێزەکانی ئەمریکا.

سەرچاوەکە ئاماژەی بەوەشکردووە، کاروانەکە ڕەنگە بەرەو بنکەکانی ئەمریکا لەناوچەی حەسەکە یان شوێنەکانی دیکە لەسوریا بڕوات، فڕۆکەی بێفڕۆکەوان‌و هێلیکۆپتەرێکی ئەپاچی یاوەرێتی کردووە بۆ دڵنیابوون لەپاراستنی لەکاتی جووڵەکەیدا.

هێزەکانی ئەمریکا ڕۆژی هەینی ڕابردوو دەستیان بەکشانەوەی کرداری لەبنکەی "عەین ئەسەد" لەپارێزگای ئەنبار لەڕۆژئاوای عێراق کرد، کە تیایدا هەندێک لەکارمەندو کەرەستەکان بەڕێگەی ئاسمانی گواسترانەوە.

بەپێی ئەو زانیارییانەی سەرچاوە ئەمنییەکان بە"بەغداد ئەلیوم"یان ڕاگەیاندووە، "پێشبینیدەکرێت بنکەی عەین ئەسەد بەتەواوی لەبوونی ئەمریکا خاڵی بێت تا سەرەتای مانگی ئەیلوولی 2025، لەگەڵ داخستنی کۆتایی بنکەکە لە 15ی ئەیلوولی داهاتودا".

ئەم کشانەوەیە لەچوارچێوەی ڕێککەوتنێکی پێشوو دێت لەنێوان بەغداو واشنتۆن کە ئامانجی کۆتاییهێنانە بەئەرکە سەربازییەکانی هاوپەیمانێتیی نێودەوڵەتی لەعێراق‌و گۆڕینی هاوبەشییەکە بۆ هاوکارییەکی ئەمنیی مەدەنی، بەوپێیەی هێزەکانی ئەمریکا بەشێوەیەکی قۆناغ بەقۆناغ کەمدەکرێنەوە بۆ کەمتر لە 500 ئەندام لەهەولێر، لەگەڵ گواستنەوەی هێزەکانی دیکە بۆ بنکەکانی تر لەناو عێراق‌و سوریا.