تائێستا هۆكارى ژه‌هراویبونى 150 كه‌سه‌كه‌ى دهۆك ئاشكرانه‌كراوه‌

دوو ڕۆژ تێپه‌ڕیوه‌ به‌سه‌ر ژه‌هراویبونى 150 هاوڵاتى له‌چێشتخانه‌یه‌كدا، به‌ڵام له‌لایه‌ن ته‌ندروستیه‌وه‌ هۆكاره‌كه‌ى ئاشكرانه‌كراوه‌و وتەبێژی تەندروستیی دهۆکیش ده‌ڵێت، "بەدواداچون بەردەوامە".

مەتین جەمیل وتەبێژی بەڕێوەبەرایەتیی تەندروستیی دهۆک ئاشكرایكردوه‌، لێکۆڵینەوە لەڕوداوی خواردنگەکەی دهۆک بەردەوامە کە بەهۆیەوە زیاتر لە 150 کەس توشی ژەهراویبون بون، بەهۆیەوە خواردنگەکە لەلایەن لیژنەکانەوە داخراوه‌و خاوەنەکەشی ڕوبەڕوی دادگا دەکرێتەوە.

به‌وته‌ى وتەبێژی تەندروستیی دهۆک، تەندروستیی سەرجەم ژه‌هراویبوه‌كان باشەو نەخۆشخانەیان بەجێهێشتوە، بەڵام بەدواداچون لەسەر ڕوداوەکەو ئەوکەسانەی توشی ژەهراویبون هاتن بەردەوامە، بۆ ئەوەی حاڵەتی لەمشێوەیە دوبارەنەبێتەوە، هەروەها یەکەمجارە حاڵەتێکی لەمشێوەیە لەسنورەکە ڕوبدات.

ڕونیشیكرده‌وه‌، لەنێو ئەوکەسانەی ژەهراویبون، ئافرەت‌و منداڵیشی تێدایە.

ڕۆژی یەکشەممەى ڕابردوو، لەیەکێک لەخواردنگه‌کانی دهۆک زیاتر لە 150 کەس ژەهراویبون‌و بەهۆیەوە لیژنەکانی قایمقامییەت خواردنگه‌كه‌یان داخست.