ته‌یف سامى له‌باره‌ى موچه‌ى مانگه‌كانى 7 تا 12 چى وت؟

دواى بڕیارى ئه‌نجومه‌نى وه‌زیرانى عێراق به‌خه‌رجكردنى موچه‌ى مانگى شه‌شى موچه‌خۆرانى هه‌رێم، وەزارەتی دارایی هەرێم ده‌ڵێت، "سبەینێ ڕێکارەکانی ناردنی داهاتی نانەوتی بۆ بەغدا دەستپێدەکەن کە 120 ملیار دینارە"، هاوكات زانیاریى له‌باره‌ى په‌یامێكى ته‌یف سامى بۆ موچه‌ى مانگه‌كانى 7 تا 12 ئاشكراده‌كرێت.
 
ئه‌مڕۆ سێشەممە کۆبونەوەی ئەنجومەنی وەزیرانی عێراق بەڕێوەچوو، تێیدا ئەنجومەنی وەزیرانی عێراق بڕیاریدا موچەی مانگی 6ی موچەخۆرانی هەرێم خەرجبکرێت، به‌ڵام هه‌م هه‌رێم‌و هه‌میش به‌غدا چاوه‌ڕوانى یه‌كتر ده‌كه‌ن.

زانیارییه‌كان باس له‌وه‌ده‌كه‌ن، هەر لەکۆبونەوەکەى ئه‌مڕۆى حكومه‌تى عێراق، بڕیاردراوه‌ کارەکانی لیژنە پێکهێندراوەکان تایبەت بەچارەسەرکردنی پرسی هەناردەکردنەوەی نەوتی هەرێم‌و موچە بەردەوامبن، بەڵام ئەو بابەتە گرێنەدراوه‌ بەناردنی موچەی مانگی حوزەیران (شه‌ش)ه‌وه‌.

ئه‌وه‌ش ئاشكرابوه‌ كه‌ ئەنجومەنی وەزیرانی عێراق یەک مەرجی داناوه‌ بۆ ناردنی موچەی مانگی شه‌شى موچه‌خۆرانى هه‌رێم، ئه‌ویش ڕادەستکردنی 120 ملیار دینار داهاتی ناوخۆیە لەلایەن هەرێمی کوردستانەوە، وەک ئەوەی بۆ مانگەکانی ئایارو حوزەیران بڕیاری لەسەردراوە.

سه‌رچاوه‌یه‌كى وه‌زاره‌تى دارایى هه‌رێمیش له‌باره‌ى ئه‌و تاكه‌ مه‌رجه‌ى به‌غداوه‌ زانیاریى ئاشكراكردوه‌و وتویه‌تى، "سبەینێ چوارشه‌ممه‌، دەست بەڕێکارەکانی ناردنی 120 ملیار دینارەکە دەکەین".

جه‌ختیكردوه‌ته‌وه‌، "ڕێکارەکانیش بریتین لەکۆکردنەوەی پارەکەو دواتر گواستنەوەی بۆ سەر هەژماری وەزارەتی دارایی عێراق، هەرکاتێكیش نوسراوەی خەرجکردنی پارەکە بۆ وەزارەتی دارایی عێراق نێردرا، ئێمه‌ش 120 ملیار دینارەکە دەخەینەسەر هەژماری وەزارەتیی دارایی عێراق".

ئه‌وه‌ش زانراوه‌، له‌كۆبونه‌وه‌كه‌ى ئه‌نجومه‌نى وه‌زیرانى عێراق سه‌باره‌ت به‌موچەی مانگى شه‌ش ته‌یف سامى وه‌زیرى دارایی عێراق ته‌نها جه‌ختى له‌120 ملیار دینارى داهاتى ناوخۆ كردوته‌وه‌، به‌ڵام بۆ مانگەکانی 7 تا 12، بەغدا بەڕاشکاوی داوای لەهەرێم کردوە تا دەستپێنەکردنەوەی هەناردەی نەوت‌و ڕادەستنەکردنی 120 ملیار دیناری داهاتی نانەوتی چاوەڕێی خەرجکردنی موچەی ئەو مانگانە نەبن.