یه‌كێتیى بۆ پارتى: ڕایبگرن ئێمه‌ش ڕایده‌گرین

دواى ڕوداوه‌كانى 22ى ئه‌م مانگه‌ى لاله‌زار له‌سلێمانى‌و هێرشكردنه‌سه‌ر لاهور شێخ جه‌نگى‌و ده‌ستگیركردنى، شه‌ڕێكى توندى میدیایى له‌نێوان پارتى‌و یه‌كێتیى، له‌نوێترین پێشهاتدا، یه‌كێتیى په‌یامێك ئاراسته‌ى پارتى ده‌كات.

سه‌ركردایه‌تیه‌كى یه‌كێتیى جه‌ختده‌كاته‌وه‌، "لاى ئێمه‌وه‌ ده‌ستى پێنه‌كردوه‌، ڕاگەیاندنی پارتی ده‌ستیپێكرد، ئه‌گه‌ر ئه‌وان ئەو شەڕى ڕاگەیاندنە ڕابگرن، یەکێتیش ڕایدەگرێت".

لەتیف نێروەیی سه‌ركردایه‌تى‌و هاوكات لێپرسراوی بۆردی ڕاگەیاندنی یەكێتیی ڕایگه‌یاند، "ئێمه‌ لەگەڵ کەشێکی ئارام‌و سەقامگیری میدیاییداین، سەقامگیری میدیایی سەقامگیریی سیاسیی دروستدەکات، سەقامگیری سیاسییش سەقامگیریی کۆمەڵایەتیی دروستدەکات‌و ڕەنگدانەوەی دەبێت بەسەر هەموو بوارەکانی تردا".

جه‌ختیكردوه‌ته‌وه‌، "پێمان  ناخۆشە شەڕی ڕاگەیاندنی نێوان یەکێتیی‌و پارتی دروستبوە، بەڵام دەسپێشخەرنەبون تا ئەو شەڕە ڕاگەیاندنە بوەستێنین".

له‌باره‌ى ڕاگەیەندراوەکەی مەکتەبی سیاسی پارتی سه‌باره‌ت به‌ڕوداوەکەی لالەزار، نێروەیی ئاماژه‌ى به‌وه‌داوه‌، "ئێمه‌ چاوەڕوانین ئەگەر میدیای پارتی پابەندبێت بەپەیامەکەی خۆیانەوەو ئەو هێرشەی دەستیان پێکردوە ڕایبگرن، ئەوە بەدڵنیاییەوە یەکێتیش پییخۆش نییە شەڕی ڕاگەیاندن هەبێت".

بەرەبەیانی 22ی ئابی 2025، ژمارەیەک هێزی ئەمنیی لەسلێمانی هێرشیانکردەسەر هۆتێل لالەزار، دوای زیاتر لەسێ کاتژمێر ڕوبەڕوبوەنەوە، لاهور شێخ جەنگی سەرۆکى بەرەى گەل‌و ئەوکەسانەشی لەهۆتێل لالەزاربون، دەستگیرکران.