ئێران و ئیسرائیل دانوستانەکانی ئەنقەرە و پەکەکە ڕادەگرن

جومعە محمـد کەریم، لێکۆڵەری سیاسی پشتڕاستی کردەوە کە دانوستانەکانی ئاشتی نێوان تورکیا و پارتی کرێکارانی کوردستان "پەکەکە" بێبەری نەبون لە کاردانەوەی ململانێی بەردەوامی ناوچەکە لە نێوان ئێران و ئیسرائیل و ئەمریکا، ئاماژە بەوەشدەدات کە ئەم ململانێیە خەریکە حیساباتی سەرجەم لایەنە ناوچەییەکان لە قاڵب دەداتەوە.

جومعە لەلێدوانێكى دا بۆ میدیا عێراقییەكان ئاشكرایكرد، هەمو پرسە ناوچەییەکان بە پڕۆسەی ئاشتی نێوان ئەنقەرە و پارتی کرێکارانی کوردستان "پەکەکە"یشەوە، بەهۆی پەرەسەندنی شەڕ لە ناوچەکەدا ڕاستەوخۆ کاریگەرییان لەسەر هەبوە،  ڕونیشیکردەوە تورکیا چاوەڕێی دەرئەنجامی ڕوبەڕوبونەوەی ناوچەکەیە پێش ئەوەی هیچ هەنگاوێکی کردەیی لە دانوستانەکاندا بنێت.

هاوكات ئەو لێكۆڵەرە سیاسیییە پێیوایە؛ دودڵيی ئەنقەرە لە هەڵوێستی پەکەکەدا ڕەنگدانەوەی هەبو، کە بۆ ماوەیەکی کاتی دانوستانەکانی ڕاگرت تاوەکو دەرکەوتنی دەستپێشخەری نوێی تورکیا، بەرزبونەوەی  رادەى پێشهات و باسەکانی گەڕانەوە بۆ شەڕی ناوچەیی، قەناعەتی تورکیا بەجۆرێك دەگۆڕێت كە نایەوێت پەلە بکات لە بڕیاردان لەسەر هیچ بڕیارێک سەبارەت بە پرۆسەی ئاشتی، كە ئەمەش بە بڕواى چاودێرانى سیاسى خۆدزینەوەى دەوڵەتى داگیركەرى توركە سەبارەت بە نیازپاكى پەكەكەو چونە پێشەوەى پرۆسەى ئاشتى لەو وڵاتەدا.

جومعە لە کۆتایی لێدوانەكەى دا دەشڵێت: هاوسەنگی ئەو هێزانەى کە شەڕ دەیسەپێنێت، تایبەتمەندییەكانى قۆناغی داهاتو دیاری دەکات، ئەمەش پرۆسەی ئاشتی دەخاتە وەستان تا وێنەی ناوچەکە ڕونتر دەبێتەوە.

جێى ئاماژەیە، پەیوەندییەکانی نێوان تورکیا و پارتی کرێکارانی کوردستان "پەکەکە" شاهیدی چەندین هەوڵی کردنەوەی کەناڵی دانوستاندن بوە بە ئامانجی کۆتاییهێنان بەو ململانێیەی کە زیاتر لە چوار دەیە درێژەی خایاندوە، کە بوەتە هۆی گیانلەدەستدانی دەیان هەزار سەرباز و هاوڵاتی مەدەنی بە هەمان شێوە.

ئەمڕۆ هەر هەوڵێکی نوێ بۆ دیالۆگ هاوکاتە لەگەڵ ژینگەیەکی زۆر ئاڵۆزی ناوچەیی، بەوپێیەی ململانێی ئێران و ئیسرائیل و دەستێوەردانەکانی ئەمریکای پەیوەست بەوەوە دۆخێکی هەڵپەسێردراو دەخاتە سەر هاوسەنگی هێز لە ناوچەکەدا.

ڕەنگە ئەنقەرە و "پەکەکە" درک بەوە بکەن کە دەرئەنجامی ئەم ململانێیە دەتوانێت هاوپەیمانی و هاوکێشە ئەمنییەکان بکێشێتەوە و بڕیاری بەرەوپێشچون لەگەڵ پڕۆسەی ئاشتی دوابخات تا وێنەی ناوچەکە ڕونتر دەبێتەوە.