هێزێكى سوپاى عێراق زەوى جوتیارە كوردەكان داگیردەكات

هێزێكى گەورەى سوپاى عێراق بەبێ هیچ سەنەدێكى یاسایى؛ لە قەزاى دوزخورماتو زیاتر لە 500 دۆنم زەوى كستوكاڵیى جوتیارە كوردەكان داگیردەكەن و بڕیاروایە سەرجەم زەوییەكانیش بدرێن بە عەرەبى هاوردەى ئەو قەزایە، كە تێكەڵەیەكن لە كوردو توركمان و عەرەب و هاوشێوەى كەركوك بە عێراقێكى بچوككراوە وەسف دەكرێت، ئەگەرچى كورد بەپێى راپرسى ساڵى 1947 زۆرینەى دانیشتوانەكەى پێكدەهێنێت كە دەكاتە رێژەى 50%ى كۆى گشتى دانیشتوانەكەى.

بەپێى زانیارییەكانى ئیرادە، جوتیارە كوردەكانى گوندەكانى سنورى دوزخورماتو لە ئێستادا خێمەو چادریان هەڵداوەو ئاماژە بەوە دەكەن بە هیچ جۆرێك دەستبەردارى ئەو زەوییە كشتوكاڵییانە نابن كە لە باوك و باپیریانەوە بۆیان بەجێماوەو ساڵانێكى زۆرە كشتوكاڵیى تێدا دەكەن، هاوكات وتوشیانە بە هیچ جۆرێك ئەو سوپا و لەشكرە گەورەیە نامانترسێنێت و زەوییەكان هەموى زەوى خۆمانەو بەهەمو جۆرێك بەرگریى لەو مافەى خۆمان دەكەین.

لەلایەكى ترەوە ئیرادە زانیویەتى كە ئەو هێزە گەورەیەى سوپاى عێراق هەر بە روكەش زەوییەكانى داگیرنەكردوە، بەڵكو هەوڵدەدات لە ژێر فشاردا بە زۆر بەڵێننامە بە جوتیارە كوردەكان پڕبكاتەوە، تا بە تەواوەتی دەستبەردارى زەوییە كشتوكاڵییەكانیان ببن و رادەستى عەرەبە هاوردەكانى بكەن.

جێى ئاماژەیە، قەزاى دوزخورماتو پێش رێككارە ئیدارییەكانى ساڵى 1976 سەر بە پارێزگاى كەركوك بوە، بەڵام لەدواى ئەو ساڵەوە لە روى ئیدارییەوە خراوەتە سەر پارێزگاى سەڵاحەدین كە زۆرینەى دانیشتوانەكەى كوردەو لە ئێستادا دەكەوێتە ناوچە كوردستانییەكانى دەرەوەى ئیدارەى هەرێمى كوردستان و ئەم هەڵسوكەوتەى ئێستاى سوپاى عێراقیش دەبێتە مایەى گۆڕانكاریى لە دیمۆگرافیاى ئەو ناوچانەو دواتریش كێشەى كۆمەڵایەتى و سیاسى گەورەى لێدەكەوێتەوە.