ئه‌نجومه‌نى سیاسیى له‌سوریا ڕاگه‌یه‌نراو ده‌سه‌ڵاته‌كه‌ى شه‌رع ڕه‌تده‌كاته‌وه‌

ئەنجومەنی سیاسی بۆ ناوەڕاست‌و ڕۆژئاوای سوریا بەفەرمیی ڕاگەیەندراو له‌په‌یامێكیشدا جه‌ختده‌كاته‌وه‌، "فیدراڵیزم چارەسەری کۆتاییە".

ژمارەیەک لەکەسایەتییە سورییەکان بەفەرمی پێکهێنانی "ئه‌نجومه‌نى سیاسیى بۆ سوریاى ناوه‌ڕاست‌و ڕۆژئاوا"یان ڕاگەیاند، بەئامانجی دروستکردنی قەوارەیەکی سیاسی نوێنەرایەتی  ناوچەی كه‌ناراوه‌كانى سوریا، لەنێویاندا پارێزگاکانی لازقییەو تەرتوس‌و بەشێک لەحومس‌و حەما.

لەبەیاننامەیەکدا کە ڕۆژنامەنووس کینان وەقاف یەکێک لەدامەزرێنەرانی ئەنجومەنەکە خوێندیه‌وه‌ ڕایگەیاند، "هەموو کەسێک گەیشتوە به‌و ڕاستیه‌ى بەکارهێنانی هێز له‌سه‌ر ناوچه‌كانى دیكه‌، بوه‌ته‌ مه‌ترسییه‌كى گه‌وره‌".

ئه‌وه‌ش هاتوه‌، "ئێستا فیدراڵیزم بۆ سوریا پێویستیه‌كى هه‌نوكه‌ییه‌و هاوكار ده‌بێت لەگۆڕینی یاساى هێز به‌هێزى یاسا، ئەنجومەنه‌كه‌مان به‌فه‌رمى داوای فیدراڵی دەکات‌و خه‌باتیش ده‌كه‌ین بۆ دابەشکردنی دەسەڵاتەکان".

ئه‌نجومه‌نه‌كه‌ چه‌ند خاڵێكى خستوه‌ته‌ڕوو كه‌ بریتین له‌:

ـ دیدگای ئەنجومەنەکە دوپاتکردنەوەی بڕیارنامەی 2254ی ئەنجومەنی ئاسایشە، بۆ پێکهێنانی دامه‌زراوه‌یه‌كى ئینتقالی، جگە لەهەموو بڕگەکانی.

ـ فۆڕمی حکومەتی ئێستاى سوریا لاى ئێمه‌ عەلمانیه‌و به‌فه‌رمیش داواى فیدراڵیی ده‌كه‌ین.

ـ ئێمە حکومەتى تاکڕەنگى دیمه‌شق ڕەتدەکەینەوە كه‌ له‌لایه‌ن یه‌ك ده‌سه‌ڵاتى باڵاوه‌ پێكهێندراوه‌ به‌بێ ڕه‌چاوكردنى هیچ نه‌ته‌وه‌و پێكهاته‌یه‌ك.

ـ ناوچەكانى ناوەڕاست‌و ڕۆژئاوای سوریا هەرێمێکە لەسەر بنەمای دادپەروەریی‌و ڕەچاوکردنی پەیمان‌و ڕێککەوتنە نێودەوڵەتییەکان خۆى خۆى به‌ڕێوه‌ده‌بات.

ئەنجومەنەکە داواشیكردوه‌، تاوانەکانی حكومه‌تى ئێستا دۆكیۆمێنت بكرێن‌و بنێردرێنه‌ دادگای تاوانە نێودەوڵەتییەکان.