شەڕی ئێران و ئیسرائیل هۆكارى پێکنەهێنانی حکومەتی هەرێمە

عەلی ئیبراهیم توێژەری کاروباری سیاسی لەبارەی هۆکارە سەرەکییەکانی پشت دواکەوتنی پێکهێنانی حکومەتی هەرێمی کوردستان لە  لێدوانێکی رۆژنامەوانیى دا رایگەیاند، بڕیاربو لێکتێگەیشتنەکان بۆ پێکهێنانی حکومەت یەکلایی بکرێتەوە، پێشبینیش دەکرا لە مانگی ئایاری 2025 پێکبهێنرێت، بەڵام دو هۆکاری زەق دۆخەکەیان تێکدا، بەتایبەتی لەناو یەکێتی نیشتمانى کوردستان.

ناوبراو ئاماژەی بەوەشکرد، یەکەمیان شەڕی ئێران و ئیسرائیلە و کاردانەوەی ڕاستەوخۆی لەسەر سلێمانی و لەسەر یەکێتییە، بە لەبەرچاوگرتنی هەڵوێست و پەیوەندییەکانی لەگەڵ ئێران و بەشێک لە هێزە شیعەکانی دەسەڵاتدار لە عێراق، پرسی دوەمیش کاردانەوەی ناکۆکی نێوان هەولێر و بەغدایە لەسەر موچە و خانەنشینی و ناكۆكیى کۆمەڵایەتی و ئابوری.

ئەو توێژەرەى كاروبارى سیاسى ئەوەشى خستەڕو كە لەڕوی مێژوییەوە شاری سلێمانی چەقی گرژییە سیاسییەکان بوە، بۆیە کاریگەرییەکانی ئەم دو فاکتەرە گەورەتر دەبن و بەخێرایی لە حیساباتی پێکهێنانی حکومەتدا ڕەنگ دەدەنەوە، لەبەرئەوە شکستی لێکتێگەیشتنەکان تەنها دەرئەنجامی کێبڕکێی ناوخۆیی نییە، بەڵکو هاوكات دەرئەنجامی فشارە هەرێمی و داراییەکانیشە.

جێى ئاماژەیە، دواکەوتنی پێکهێنانی حکومەتی هەرێم دوای هەڵبژاردنەکانی نزیكەى 10 مانگ لەمەوبەر بۆتە مایەی مشتومڕێکی بەرفراوان و چاودێران هۆکارەکەی دەگەڕێننەوە بۆ کەڵەکەبونی ناکۆکی نێوان هەردو لایەنی سەرەکی "پارتی و یەکێتی" لەسەر دابەشکردنی پۆستەکان، هاوکات لەگەڵ فشارە بەردەوامەکانی بەغدا سەبارەت بە پرسی نەوت و موچە، وایکردوە دانوستانەکان لە خولەکانی پێشو ئاڵۆزتر بن.