ئەمڕۆ كامێراكانى هەردو رێگەى تاسڵوجەو عەربەت دەكەونەكار

بەگوێرەى زانیارییەكانى ئیرادە كە لە بەڕێوەبەرایەتى هاتوچۆى سلێمانى دەستیكەوتوە، ئەمرۆِ پێنچ شەممە كاتژمێر 10ى سەرلەبەیانى كامێراكانى سەر رێگاى نێوان سلێمانى- تاسڵوجە بە هەردو سایدى رۆیشتن لەگەڵ رێگەى نێوان سلێمانى- وارماوا كه بە عەربەت دا تێدەپەڕێت دەكەونەكار.

هەر بەپێى ئەو زانیارییانەى ئیرادە بەدەستى گەیشتوە،  كامێراكانى رێى تاسڵوجە تەنها وەن پۆینتە واتا جێگیرن و ئەوانەى رێگەى عەربەت و وارماوا پۆینت تو پۆینتە واتا خێرایى نێوان دو كامێرا یان زیاتر پێكەوە تۆماردەكات و شۆفێر دەبێت بە هۆشیارییەوەو بەپێی ئەو خێراییانەی کە لە هێماکانی هاتوچۆی تەنیشت ڕێگاکە دانراون، شۆفێریى بكات.

هاوكات ئیرادە زانیویەتى لەكاتى هەژماركردنى سەرپێچییەكاندا ماوەیەك تەرخانكراوە بۆ لێبوردن و بە "سنوریى لێبوردن" دادەنرێت، كە بۆ خێرایى ئۆتۆمبێلى بچوك ماوەكە پێنچ كیلۆمەترەو بۆ بارهەڵگریش سێ كیلۆمەترە.

سەبارەت بە میكانیزمى تۆمارکردنی سەرپێچی تیژڕەوی لەو کامێرایانەی بە سیستەمی  پۆینت تو پۆینت كاردەكەن، تێکڕای خێرایی لە هەمو کامێراکان هەژمار دەکرێت، واتا لە نێوان دو کامێرادا پێویستە شۆفێر بە خێرایی ڕیگەپێدراو کە دیاریکراوە شۆفێریی بکات، بە پێچەوانەوە سزای دیاریکراو دەدرێت بەپێى هێماى رێگەپێدراوى تیژڕەويى سەرشەقامەكان كە دیاریكراوە.

پێشتریش بەڕێوەبەرایەتى هاتوچۆى سلێمانى لە بەیاننامەیەك دا ئاماژەى بەوەدابو كە، میکانیزمی سەرپێچی تۆمارکردنی تیژڕەويی لە کامێراکان بەپێی فەرمانی وەزارەتی ناوخۆ ڕێکخراوە، واتە سەرجەم بەڕێوەبەرایەتییەکانی هاتوچۆ لە هەرێـمی کوردستان بە یەک سیستەم کاردەکەن بێ جیاوازی لەو شەقام و ڕێگایانەی ناوەوە و دەرەوەی شارەکان لە هەرێم کە کامێراکانی تیژڕەويی تێدایە.