له‌باره‌ى دابه‌زینى به‌هاى دینار به‌رامبه‌ر دۆلار بانكى ناوه‌ندیى هاته‌ده‌نگ

بانکی ناوەندیی عێراق سه‌باره‌ت به‌دابه‌زینى به‌هاى دینارى عێراقى له‌به‌رامبه‌ر دۆلارى ئه‌مریكى هاته‌ده‌نگ‌و ڕایده‌گه‌یه‌نێت، "پابەندبوونی خۆمان بەپاراستنی سەقامگیریی نرخی ئاڵوگۆڕی دراو دوپاتده‌كه‌ینه‌وه‌"، ده‌شڵێت، "هیچ به‌رنامه‌یه‌كمان بۆ گۆڕانكاریى نییه‌".

له‌راگه‌یه‌نراوێكدا بانكى ناوه‌ندیى نووسیویه‌تى، "بەهۆی ئه‌و پاڵپشتیه‌ی به‌های دیناری عێراقی هه‌یه‌تی له‌دراوی بیانی‌و یەدەگی زێڕ، هیچ پلانێکمان نییه‌ بۆ دەستکاریکردنی به‌های دیناری عێراقی".

ئاماژه‌ به‌وه‌شكراوه‌، "لەگەڵ نزیکبوونەوەی کۆتایی ساڵی 2025، بانکی ناوەندیی عێراق پێشکەوتنی بەرچاوی لەئامانجە ستراتیژییەکانی پەیوەست بەپاراستنی سەقامگیریی نرخەکانی ڕاگەیاندووه‌و ڕێژەی هەڵاوسانیش به‌به‌راورد به‌وڵاتانی ناوچه‌كه‌ بۆ ئاستێکی نزم دابەزیوە".

ڕاگه‌یه‌نراوه‌كه‌ى بانكی ناوه‌ندیی عێراق دوای ئه‌وه‌دێت، نه‌بیل مەرسومی شارەزای ئابووریی عێراقی وتویه‌تى، "حکومەتی داهاتووی عێراق ناچارە نرخی فرۆشتنی دۆلار بەرزبکاتەوە بۆ 180 هەزار تاوەکو 200 هەزار دینار له‌پێناو چاره‌سه‌ركردنی ئه‌و كورتهێنانه‌ی كه‌ هه‌یه‌تی".

هه‌ر ئه‌مڕۆش نرخی 100 دۆلاری ئه‌مریكی گه‌یشته‌ 143 هه‌زار دینارو زیاتریش.