دادگای فیدراڵی سکاڵایەکی لەبارەی پێناسی گومرگییەوە رەتکردەوە

ناوەندی هەواڵ

دادگای باڵای فیدراڵیی عێراق داوایەکی یاسایی دژی بڕیارەکانی ئەنجومەنی وەزیران سەبارەت بە پێناسی گومرگی، بەهۆی نەبوونی ”بەرژەوەندی” رەتکردەوە.

محەمەد جاسم خەفاجی، ئەندامی پەرلەمانی عێراق کە سکاڵای یاسایی لەسەر بڕیاری 957 سەبارەت بە پێناسی گومرگی تۆمارکردووە، لە سکاڵاکەیدا جەختی لەوەکردبوو کە بڕیارەکە لەلایەن حکومەتێکی کاربەڕێکەرەوە دەرکراوە.

دادگا سکاڵاکەی بەهۆی ”نەبوونی بەرژەوەندی” رەتکردەوە، واتە ئەو ئەندامەی پەرلەمان هیچ بەرژەوەندییەکی لەو بڕیارەدا نییە.

پێشتر، وەزیری بازرگانی عیراقی رایگەیاند بوو، لەکاتی جێبەجێکردنی بڕیارەکەدا، دڵنیایی دەدەن  بە هاوڵاتییان، کە حکومەت بە هیچ شێوەیەک رێگە بە بەرزبوونەوەی نرخەکان نادات و وەک هێزێکی هاوسەنگ لە بەرانبەر قۆرخکاریی بازاڕدا دەوەستێتەوە.

راگەیاندنی بڕیاری گومرگی نوێ، شەپۆلێکی ناڕەزایەتی دروستکرد، لە بەغدادی پایتەخت و چەند پارێزگایەکی تر،  ژمارەیەکی زۆر دوکاندار بە داخستنی دوکانەکانیان و هاتنە سەر شەقام دژی بڕیارەکە وەستانەوە.