لێواری تەقینەوە؛ توندبوونی هێرشەکانی ئەمریکا بۆ سەر ئێران و هەوڵی نەتانیاهۆ بۆ ڕاکێشانی سەرنجی ترەمپ

لە کاتێکدا هێرشە سەربازییەکانی ئەمریکا بۆ سەر ئێران پێ دەنێتە چوارەمین ڕۆژی خۆی و واشنتۆن هەڕەشەی بەئامانجگرتنی ژێرخانی وزەی تاران دەکات، بنیامین نەتانیاهۆ سەرۆکوەزیرانی ئیسرائیل بڕیارە بەرەو واشنتۆن بەڕێبکەوێت؛ گەشتێک کە ئامانج لێی کۆبوونەوەیە لەگەڵ دۆناڵد ترەمپ و چاککردنەوەی ئەو متمانەیەی بەهۆی جەنگی ئێرانەوە درزی تێکەوتبوو.

چڕبوونەوەی هێرشەکانی سێنتکۆم و کاردانەوەی تاران

فەرماندەیی ناوەندیی سوپای ئەمریکا (سێنتکۆم) ڕایگەیاند، شەپۆلێکی نوێی هێرشەکانی بۆ سەر ئێران دەستپێکردووە بە ئامانجی لاوازکردنی توانای تاران بۆ هێرشکردنە سەر کەشتییە بازرگانییەکان لە گەرووی هورمز.

ئەم گرژییە نوێیە ئاگربەستی مانگی حوزەیرانی نێوان هەردوو وڵاتی بە تەواوی هەڵوەشاندەوە. بەپێی سەرچاوەکان:

زیانە گیانییەکان: فاتیمە موهاجرانی، گوتەبێژی حکومەتی ئێران ڕایگەیاندووە کە بەهۆی هێرشەکانی چەند ڕۆژی ڕابردووی ئەمریکاوە بۆ سەر باشووری وڵاتەکە، زیاتر لە 30 کەس کوژراون. هەروەها تەلەفزیۆنی فەرمی ئێران کوژرانی 7 سەربازی لە بنکەیەکی سەربازیی ناوچەی بەمپور پشتڕاستکردووەتەوە.

زیانە مادییەکان: هێرشەکان ناوچەی جیاوازی وەک بوشەهر (کە وێستگەی ئەتۆمی تێدایە)یان کردووەتە ئامانژ، بەڵام میدیاکانی ئێران دەڵێن وێستگەکە زیانی پێ نەگەیشتووە.

ترەمپ لە ژووری ئۆپراسیۆنەکان؛ هەڕەشەی وێرانکردنی ژێرخانی ئێران

ماڵپەڕی "ئاکسیۆس" لە زاری سێ سەرچاوەی ئاگادارەوە ئاشکرای کردووە کە دۆناڵد ترەمپ، سەرۆکی ئەمریکا لە "ژووری بارودۆخەکان" لە کۆشکی سپی، تاوتوێی فراوانکردنی هێرشە سەربازییەکانی بۆ سەر ئێران کردووە بۆ دەرەوەی گەرووی هورمز، بە ئامانجی ناچارکردنی تاران بۆ قبوڵکردنی مەرجە ئەتۆمییەکان.

ترەمپ لە چاوپێکەوتنێکدا لەگەڵ کەناڵی "فۆکس نیوز" هۆشداریدا و ڕایگەیاند:

"ئەمشەو و سبەی و ڕۆژی دواتریش بە توندی لە ئێران دەدەین، هەفتەی داهاتووش شتەکان بۆیان خراپتر دەبن. ئەگەر تاران نەیێتە سەر مێزی دانوستان، ژێرخانی وزە، وێستگەکانی کارەبا و پردەکانی ئێران دەبنە ئامانج."

تاران: ئەمریکا پێگە مەدەنییەکان بۆردومان دەکات

میدیا فەرمییەکانی ئێران (ئیسنا، میهر و تەسنیم) بڵاویانکردەوە کە سوپای ئەمریکا لە هێرشەکانیدا چەندین پێگەی سڤیل و مەدەنی کردووەتە ئامانج، لەوانە:

1.     یەکەیەکی بەرهەمهێنانی ئاوی کانزایی لە ناوچەی موسیانی سەر بە پارێزگاری دێهلۆران.

2.     تاوەری چاودێری دەریاوانی لە شاری چابەهار کە بۆ گەڕان و ڕزگارکردنی ماسیگران بەکاردێت.

3.     سایلۆیەکی گەنمی گەورە لە شاری هوەیزە لە پارێزگای خوزستان.

جوڵە دیپلۆماسییەکان؛ نەتانیاهۆ بەدوای ترەمپدا دەگەڕێت

لەکاتێکدا سوپای ئەمریکا بەردەوامە لە بۆردومانەکان و گەمارۆی دەریایی ئێران، ئیسرائیل تا ئێستا تەنیا بە هەڕەشەی زارەکی بەشدار بووە و هیچ هێرشێکی ڕاستەوخۆی ئەنجام نەداوە.

لەم چوارچێوەیەدا، سەرچاوەیەکی باڵای ئیسرائیلی ئاشکرای کردووە کە بنیامین نەتانیاهۆ ڕۆژی شەممەی داهاتوو دەچێتە ئەمریکا و نوسینگەکەی هەوڵێکی زۆر دەدات بۆ ڕێکخستنی دیدارێک لەگەڵ دۆناڵد ترەمپ. ئامانجی سەرەکی نەتانیاهۆ لەم دیدارە گێڕانەوەی متمانەی نێوانیانە، بە تایبەت دوای ئەوەی ئیدارەی ترەمپ ڕەخنەی توندی لێگرتبوو و تۆمەتباری کردبوو بەوەی لێکدانەوەی هەڵەی بۆ شەڕی دژ بە ئێران کردووە.