وەزیری پلاندانانی هەرێم: هەموو كێشەكانی سەرژمێری چارەسەركراون

ناوەندی هەواڵ

وەزیری پلاندانانی هەرێمی كوردستان ڕایگەیاند هەموو ئەو تێبینیانەی لەبارەی سەرژمێری هەیانبووە لەلایەن حكومەتی عێراقەوە چارەسەر كراون.

دارا ڕەشید، وەزیری پلاندانانی هەرێمی كوردستان ڕایگەیاند: ئەو زانیارییانەی لە پرۆسەی سەرژمێری دەستمان دەكەوێت گرنگ و وردە، ئەو كەسانەی تۆماریش دەكرێن لە هەر ناوچەیەك دەبێت خەڵكی ڕەسەنی ناوچەكە بن.

وەزیری پلاندانانی هەرێم وتیشی: لەهەندێك شوێن كێشەی تەكنیكی هەبوە و هەوڵی چارەسەركردنی دەدرێت.

دارا ڕەشید سوپاسی وەزارەتی پلاندانانی عێراق دەكات كە سەرجەم ئەو كێشانەی چارەسەركردووە كە ڕوبەڕوویان بووەتەوە.

"لەگەڵ دەستەكانی ئاماری هەرێمی كوردستان كاردەكەین بۆ سەركەوتنی پرۆسەی سەرژمێری گشتیی، قۆناغی یەكەم و دووەمیش سەركەوتوو بووە". دارا ڕەشید وا دەڵێت.

ئەمڕۆ و سبەینێ سێیەم قۆناغی سەرژمێری گشتی دانیشتوان لە عێراق و هەرێمی كوردستان دەستیپێكرد و هەردوو ڕۆژەكەش كراوە بە پشوو و قەدەغەی هاتوچۆش ڕادەگەیەنرێت.