بۆردوومانەکانى تورکیا کشەى بۆ سەرژمێری درووستكردووە

ناوەندی هەواڵ

سەرۆكی دەستەی ئامار و بریكاری وەزارەتی پلاندانانی حكومەتی هەرێم ریگەیاند، ئەو شوێنانەى مەترسى بۆردوومانى تورکیایان لەسەرە کێشە بۆ پرۆسەى سەرژمێرى دروستبووە و بژمێرەکان ناتوانن بچنە ئەو شوێنانە و سەرژمێرى خێرزانەکان بکەن.

ماوەی دوو ڕۆژە پرۆسەی سەرژمێری گشتی دانیشتووانی عێراق و هەرێمی كوردستان دەستیپێكردووە، بەڵام لە بەشێک لە ناوچەکانى هەرێم مەترسى بۆردوومانى تورکیا هەیە و بەو هۆیەوە پرۆسەى سەرژمێرى بەتیبەت لە سنورى بادینان کێشەى بۆ دروستبووە و بژێرەکان ناتوانن کارەکانیان ئەنجام بدەن.

سیروان محەمەد سەرۆكی دەستەی ئامار و بریكاری وەزارەتی پلاندانانی حكومەتی هەرێمی كوردستان ڕایگەیاند، بۆردوومانەكانی سوپای توركیا گرفتی بۆ پرۆسەی سەرژمیری درووستكردووە و بەهۆی بۆردوومانەكانەوە ناتوانین بژمێر بنێرینە ئەو ناوچانەی مەترسیى هێرشیان لەسەرە.

ڕۆژانە تورکیا  بۆردوومانی ناوچە جیاوازەكانی هەرێمی كوردستان دەكات و هاوڵاتی مەدەنی و ژینگەكەی دەكاتە ئامانج بەڵام تا ئێستا حكومەتی عێراق و كاربەڕێكەری هەرێم هیچ هەڵوێستێكیان نەبووە.