بی بی سی: تورکیا کارەبا و ئاوی ملیۆنێک کەسی لە ڕۆژئاوای کوردستان بڕیوە

ناوەندی هەواڵ

کەناڵی بی بی سی به‌ریتانى بڵاویکردەوە، هێرشە ئاسمانییەکانی تورکیا بۆ سەر باکورو ڕۆژهەڵاتی سوریا کارەبا و ئاوی زیاتر لە ملیۆنێک کەس بڕیوە .

بی بی سی لەزاری شارەزایانەوە نوسیویەتی بۆردوومانەکانی تورکیا بۆ سەر باکور و ڕۆژهەڵاتی سوریا پێشێلکردنی یاسا نێودەوڵەتییەکانه‌.

لێکۆڵینەوەیەکی کەناڵی بی بی سی دەریدەخات، تورکیا لە نێوان ئۆکتۆبەری 2019 تا مانگی 1ی 2024 زیاتر لە 100 هێرشی کردووەتە سەر کێڵگە نەوتییەکان، دامەزراوە گازییەکان، وێستگەکانی کارەبا و ناوەندە خزمەتگوزاریەکانی باکور و ڕۆژهەڵاتی سوریا.

هێرشەکان قەیرانی مرۆیی لە ناوچەکەدا دروستکردووە، ئەوە جگە لە چەندین قەیرانی دیکە و وشکەساڵی و گۆڕانی کەش و هەوا لە ناوچەکە.

بەپێی لێکۆڵینەوەکەی بی بی سی هێرشەکانی تورکیا بۆ سەر ژێرخانی کارەبا لە مانگی تشرینی یەکەمی ساڵی ڕابردوودا بووەتە هۆی پچڕانی کارەبای وێستگەی سەرەکی ئاوی هەرێمە جیاوازەکانی باکور و ڕۆژهەڵاتی سوریا .