تورکیا بە چڕى سنورى دهۆکى بۆردوومان کرد

ناوەندی هەواڵ

تورکیا بەچڕى دەستى بە بۆردوومانکردنى سنورى پارێزگاى دهۆک کردوە و تەنها لەمڕۆدا چوار جار لە رێگەى فڕۆکەى جەنگییەوە بۆردومانى چەند شوێنێکى ئەو سنورەى کردووە.

زیاتر لە سێ ساڵە توركیا بە بیانووی هێرشكردنە سەر پێگەكانی پارتی كرێكارانی كوردستان، لەشكركێسی كردووەتە سەر هەرێمی كوردستان و دەیان كیلۆمەتری لە سنووری هەردوو پارێزگەی هەولێر و دهۆك داگیركردووە و زیاتر لە 80 بارەگای سەربازی كردووەتەوە و تا ئێستاش لەشکرکێشى و بۆردوومانەکانى بەردەوامن و بەرپرسانى هەرێمیش لەبەرامبەر ئەو پێشێلکاریانە بێدەنگییان هەڵبژاردووە.

بە پێی ئامارەكانی ڕێكخراوی “سی پی تی” ئەمریكی، تا ئێستا دەیان هاووڵاتیی بوونەتە قوربانیی ئەو هێرشانەی كە توركیا دەیانكاتە سەر هەرێمی كوردستان.

ئەمڕۆ یەکشەممە 1-12-2024،  جارێکى دیکە فڕۆکە جەنگییەکانى تورکیا بۆردوومانی چیای خێرێ لە سنووری گوندی باسفرای سەربە شارۆچکەی شێخان لە پارێزگای دهۆک کرد.

لە زانیارییەکاندا هاتووە، تا ئێستاش زیانەکانی بۆردوومانە نەزاندراوە و فڕۆکە جەنگەیەکان بەردەوام بە ئاسمانی ناوچەکەدا دەسوڕێنەوە و ترس و دڵەڕاوکێیەکى زۆریش لەناو هاوڵاتیاندا بڵاوبووەتەوە.