ساڵانە 15 هەزار هاوڵاتی سەردانی نەخۆشخانەی شەهید هێمنی دەروونی لە سلێمانی دەکەن

بۆ بینینی توێژەری دەروونی نەخۆش پێویستی بە چاوەڕوانی تا سێ مانگ هەیە

سلێمانی - ئیرادە میدیا

بەڕێوەبەری نەخۆشخانەی شەهید هێمنی دەروونی ئاشکرای کرد ساڵانە نزیکەی 15 هەزار هاوڵاتی بۆ وەرگرتنی خزمەتگوزاری و چارەسەری دەروونی سەردانی  نەخۆشخانەکەیان دەکەن، لە کاتێکدا زۆربەی ئەوان تەنها پێویستیان بە دانیشتنی دەروونی هەیە.

دکتۆر سامان ئەنوەر فەتاح بە ئیرادە میدیا وت، نزیکەی 99٪ی سەردانکەران بۆ راوێژکاری و دانیشتنی دەروونی دێن و ژمارەی ئەوانەی داخڵی نەخۆشخانە دەکرێن لە 100کەس تێناپەڕێت، بەڵام بۆ بینینی توێژەری دەروونی، لە هەندێک حاڵەتدا نەخۆش پێویستی بە چاوەڕوانی تا سێ مانگ هەیە.

بەڕێوەبەری نەخۆشخانەکە ڕوونی کردەوە کە زۆربەی نەخۆشییە دەروونییەکان لە نێوان تەمەنی 25 تا 45 ساڵدا دەردەکەون و هۆکارەکانیان تەنها یەک هۆکار نییە، بەڵکو بارودۆخی ئابووری، شێوازی ژیان، کێشە خێزانی و فشارەکانی ژیان لە گرنگترین فاکتەرەکانن.

ئاماژەی بەوەشکرد،  خەمۆکی لەناو ژنان زیاترە، بەڵام شیزۆفرینیا و دوجەمسەری لەناو پیاواندا بەرچاوترن.

دکتۆر نیاز محەمەد، پسپۆڕی کۆمەڵناسی پزیشکی، بە ئیرادە میدیای ڕاگەیاند، هەموو فشارێکی دەروونی بە مانای نەخۆشی دەروونی نییە، بە وتەی ئەو، فشاری کار، بارودۆخی خێزان و گرفتی ژیان ڕۆڵێکی گەورە لە زیادبوونی پەستانی دەروونی هەیە، بەڵام لە هەمان کاتدا هۆشیاری کۆمەڵگا دەربارەی تەندروستی دەروونی بەرزتر بووەتەوە.

بەپێی داتاکانی ڕێکخراوی تەندروستی جیهانی (WHO)، لە هەر هەشت کەس لە جیهان، یەک کەس لە ژیانی خۆیدا پێویستی بە خزمەتگوزاری یان چارەسەری دەروونی دەبێت.