لە زەوی و ئاسمانەوە؛ ئەمریكا بنكە سەربازییەكانی لە ڕۆژئاوای كوردستان بەهێز دەكات

ناوەندی هەواڵ

 لە زەوی و ئاسمانەوە؛ ئەمریكا بنكە سەربازییەكانی لە ڕۆژئاوای كوردستان بەهێز دەكات و هێزی زیاتر دەباتە ڕۆژئاوای کوردستان، ئەوەش هاوکاتە لەگەڵ هەڕەشەکانی تورکیا و گروپە چەکدارە بەکرێگیراوەکانی دژ بە ڕۆژئاوای کوردستان.

فرۆكەیەكی بارهەڵگری ئەمریكا بە پشتیوانی هێلیكۆپتەرێكی سەربازی، پاش نیوەڕۆی ئەمڕۆ لە بنكەی سەربازی خەراب ئەلجیری ڕمێلان لە باكوری حەسەكەی ڕۆژئاوای كوردستان نیشتەوە، فرۆكەكە هەڵگری سەرباز و پشتیوانی سەربازی و لۆجیستی بوو.

لە هەمانكاتدا، ڕیزێك بارهەڵگری ئەمریكا كە مەزەندە دەكرێت 25 بارهەڵگر بووبن، بەنزین و سندوقی داخراو و ئۆتۆمبێلی سەربازییان لە دەروازەی وەلیدەوە گواستەوە بۆ بنكەی هاوپەیمانان لە حەسەكە.

بردنی ئەو هاوكارییە سەربازی و لۆجیستیانە بۆ ڕۆژئاوای كوردستان، هاوكاتە لەگەڵ بردنی هاوكاری سەربازی بۆ بنكەكانی دیكەی ئەمریكا لە سوریا.

بەوتەی ڕوانگەی سوریا بۆ مافەكانی مرۆڤ، هەر ئەمڕۆ هاوپەیمانی نێودەوڵەتی بە سەرۆكایەتی ئەمریكا پشتیوانی سەربازی و پزیشكی و چەندین سندوقی داخراوی لەسەر بارهەڵگر بردووەتە بنكەی كۆنیكۆی غازیی لە دێرەزوور.