سەرۆكوەزیرانى پێشوى فەلەستین: كورد پشتگیریى ئیسرائیل ناكات

پاش بەشداریكردنى لە کۆنفرانسی هاوپەیمانانی سۆسیال دیموکراتى وڵاتانی عەرەبی لە شارى سلێمانى، دکتۆر محـمد ئەشتییە، سەرۆکوەزیرانی پێشوی فەلەستین، ستایشی هەرێمی کوردستانی کرد و ئەو تۆمەتانەی ڕەتکردەوە کە کورد پەیوەندییەکی باشی لەگەڵ ئیسرائیل هەیە.

سەرۆکوەزیرانی پێشوی فەلەستین لە میانی بەشداریكردنى لە بەرنامەی کاروباری عێراق لەگەڵ فائیق ئێزدی-ى پێشكەشكار، جەختی لەوە کردەوە کە فەلەستین لە دڵی هەمو کوردێکدایەو ئاماژەی بەوەشکرد کە ئەمڕۆ قێزەونترین شێوەی جینۆساید لە دژی گەلەکەیان لە کەرتی غەززە دەکرێت، ئەمە جگە لە هێرشی نیشتەجێبوەكانى کەرتی ڕۆژئاوا.

دکتۆر محـمد ئەشتییە، ئەوەشى خستەڕو كە ئامادەکارییەکان بۆ لەشکرکێشییەکی تەواو بۆ سەر شاری غەززە، کە زیاتر لە نیو ملیۆن کەسی تێدایە، لە ئارادایە و تا ئێستاش زیاتر لە 100 هەزار کەس لەو كەرتەدا شەهیدبون "بەوتەى خۆى".

سەرۆکوەزیرانی پێشووی فەلەستین وتیشى: زیاتر لە 200 هەزار کەس بریندارن و  نزیکەی 400 هەزار یەکەی نیشتەجێبونیش لەناوچون، لەکاتێکدا شارەکانی باشور و باکوری کەرتی غەززە لەسەر ڕوی زەوی سڕاونەتەوە.