نه‌وه‌یه‌كگرتوه‌كان هۆشداریى ده‌دات

میرجانا سپۆلجاریچ سەرۆکی کۆمیتەی نێودەوڵەتیی خاچی سور وێڕای ئیدانەکردنی پلانەکانی ئیسرائیل بۆ چۆڵکردنی شاری غەززە لەدانیشتوانەکەی جەختیکردەوە، ناتوانرێت چۆڵکردنی بەکۆمەڵ بەسەلامەتی ئەنجامبدرێت، ئه‌وه‌ش به‌هۆی نه‌بونی ژێرخانی مرۆیی له‌ناوچه‌كه‌.

میرجانا سپۆلجاریک سەرۆکی کۆمیتەی نێودەوڵەتیی خاچی سور لەبەیاننامەیەکدا ڕایگه‌یاندوه‌، لەهەلومەرجی ئێستادا مەحاڵە چۆڵکردنی بەکۆمەڵ لەشاری غەززە بەشێوەیەکی سەلامەت‌و شکۆمەندانە ئەنجامبدرێت‌و پلانەکانی چۆڵکردنی شاری غەززەی بەمه‌حاڵ وه‌سفكردوه‌.

ده‌شڵێت:"چۆڵکردنی لەو شێوەیە دەبێتە هۆی جوڵەیەکی بەرفراوانی دانیشتوان کە هیچ ناوچەیەک لەکەرتی غەزە ناتوانێت جێگەی بگرێتەوە، بەلەبەرچاوگرتنی ڕادەی وێرانکارییەکانی دامەزراوە مەدەنییەکان‌و کەمیی خۆراک‌و ئاوو شوێنی نیشتەجێبون‌و چاودێری پزیشکی".

ئه‌مه‌ش له‌كاتێكدایه‌، سوپای ئیسرائیل دوێنێ هەینی شاری غەززەی بە"ناوچەی مەترسیداری شەڕ" ناساندو ڕاشیگه‌یاند، خۆی ئامادە دەکات بۆ كۆنتڕۆڵكردنی گەورەترین شاری فەڵەستین دوای نزیکەی دوو ساڵ لەبه‌رده‌وامی شەڕەکە ئه‌ویش غه‌ززه‌یه‌.

ئاژانسه‌كانى هه‌واڵ باس له‌وه‌ده‌كه‌ن، سوپای ئیسرائیل تائێستا داوای لەدانیشتوانی به‌شی باكوری غه‌ززه‌ نەکردوە شارەکە چۆڵبکەن، بەڵام وتەبێژی سوپاى ئیسرائیل ئەو وڵاتە چوارشەممەى ڕابردوو ڕایگەیاند، "چۆڵکردنی دانیشتوانی شارەکە حەتمییەو جێبه‌جێده‌كرێت".

ئیسرائیل لەژێر فشاری نێودەوڵەتی‌و ناوخۆییدایە بۆ کۆتاییهێنان بەشەڕی وێرانکەری کەرتی غەززە، کە زۆرینەی دانیشتوانەکەی ئاوارەبون‌و نەتەوەیەکگرتوەکانیش برسێتی توندی لەغەززە ڕاگەیاندوە.