كونسوڵى به‌ریتانیا ده‌چێته‌ زیندانى كانى گۆمه‌و سه‌ردانى لاهور شێخ جه‌نگى ده‌كات

به‌پێى ئه‌و زانیاریانه‌ى نوێنەری قەوارەی بەرەی گەل لەهەولێر ئاشكرایكردوه‌، ئەمڕۆ یەکشەممە، كونسوڵی گشتیی بەریتانیا لەهەرێمی كوردستان، سەردانی لاهور شێخ جەنگی كردوه‌ لەزیندانى كانى گۆمه‌.

دوای شەڕەكه‌ى به‌ره‌به‌یانى ڕۆژى 22ى مانگى ڕابردوى هۆتێل لالەزار لەشاری سلێمانی، كە بوە هۆی كوژرانی دەیان كەس‌و زیانگەیاندن بەموڵك‌و ماڵی هاوڵاتیان، لاهور شێخ جەنگی سەرۆكی بەرەی گەل، لەلایەن هێزە ئەمنییەكانه‌وه‌ دەستگیركراو تائێستا لەزیندانی كانی گۆمەی ئاسایش زیندانیكراوە.

له‌وباره‌یه‌وه‌ شادومان مەلا حەسەن نوێنەری قەوارەی بەرەی گەل لەهەولێر ڕایگەیاند، ئەمڕۆ ئەندرو بیزلی کونسوڵی گشتیی بەریتانیا لەهەرێمی کوردستان سەردانی لاهور شێخ جەنگی سەرۆكی زیندانیكراوی بەرەی گەلی کردوە.

وه‌كو شادومان مه‌لا حه‌سه‌ن باسیكردوه‌، "كونسوڵی گشتیی بەریتانیا وتویەتی، دۆخی لاهور شێخ جەنگی لەزیندان باشە".

لاهور شێخ جەنگی جگەلەوەی كەسایەتییەكی سیاسییە‌و سەرۆكایەتیی پارتێكی سیاسیی مۆڵەتپێدراو دەكات، خاوەنی ڕەگەزنامەی بەریتانیایە.