ئۆلاجه‌ن پارتێكى نوێ داده‌مه‌زرێنێت

ڕۆژنامەنوسێکی تورک زانیارییه‌كى گرنگ له‌باره‌ى پلانێكى عه‌بدوڵڵا ئۆجه‌لانه‌وه‌ ئاشكراده‌كات‌و ڕاشیده‌گه‌یه‌نێت، "ئۆجه‌لان پارتێكى نوێ له‌توركیا داده‌مه‌زرێنێت‌و سه‌رۆكى داهاتوى ئه‌و پارته‌ نوێیه‌ش ده‌میرتاش نابێت، به‌ڵكو بوڵدانه‌".

سەدات بۆزکورت ڕۆژنامەنوسی دیارى تورکیا ئاشكرایكردوه‌، عەبدوڵڵا ئۆجەلان ڕێبەری پارتی کرێکارانی کوردستان (پەکەکە) خۆی ئامادەدەکات بۆ دامەزراندنی پارتێکی نوێی سیاسیی كه‌ ناوى توركیا له‌ناو پارته‌كه‌دا هه‌یه‌.

به‌وته‌ى سه‌دات، "عەبدوڵڵا ئۆجەلان خۆی بەرنامەی حزبەکە دەنوسێت‌و پەروین بوڵدان ئەندامی شاندی ئیمراڵی‌و پەرلەمانتاری هەدەپە دەکاتە سەرۆکی ئەو پارتەو هەروەها دەم پارتی دادەخرێت".

ئه‌وه‌شى ئاشكراكردوه‌، "هەدەپە داناخرێت، بەڵام لەئەگەری ئازادبونی سەڵاحەدین دەمیرتاش، دەم پارتی دادەخرێت، بەمەش چالاکی سیاسیی لەباکوری کوردستان دەچێتە قۆناغێکی نوێوە".

تائێستا هیچ کەسێکی نزیک لەئۆجەلان یاخود بەرپرسانی دەم پارتی، زانیاری یان ڕونکردنەوەیان لەسەر ئەو زانیاریانه‌ نه‌داوه‌ كه‌ سه‌دات ئاشكرایكردوه‌.