بەرپرسێکی باڵای ئاکپارتی: هیچ داواکارییەک بۆ مافی هیوا یان ئازادکردنی ئۆجەلان پێشکێش نەکراوە

ئیرادە میدیا

ئۆزڵەم زەنگین، بریکاری سەرۆکی فراکسیۆنی پارتی داد و گەشەپێدان (ئاکپارتی) لە پەرلەمانی تورکیا، بە توندی ئەو دەنگۆیانەی ڕەتکردەوە کە باس لە پێشکەشکردنی داواکاری بۆ لێبووردنی گشتی یان مافی هیوا بۆ عەبدوڵڵا ئۆجەلان، ڕێبەری زیندانیکراوی پارتی کرێکارانی کوردستان (پەکەکە)، دەکەن.

زەنگین، لە میانەی بەشداریکردنی لە بەرنامەیەکی فیدراسیۆنی میدیداکانی تورکیادا لە ئەنقەرە، وەڵامی پرسیاری ڕۆژنامەنووسانی دایەوە و ڕایگەیاند: "هیچ داواکارییەکی لەو شێوەیە بۆ مافی هیوا بۆ عەبدوڵڵا ئۆجەلان پێشکێش نەکراوە."

ئەو بەرپرسە باڵایەی ئاکپارتی ئاماژەی بەوەشکرد: بە پێچەوانەوە چەندینجار گوتراوە، ئۆجەلان هیچ داواکارییەکی بۆ دەرچوون لە ئیمڕاڵی نەکردووە." هەروەها ئاشکرای کرد کە شاندی هاوسەرۆکانی پارتی یەکسانی و دیموکراسی گەلان (دەم پارتی) کاتێک سەردانی ئەوانیان کردووە، جەختیان لەوە کردووەتەوە کە "بۆ دەرچوونی (ئۆجەلان) هیچ داواکارییەک نییە."

لەبارەی پرۆسەی چارەسەری پرسی کورد، ئۆزڵەم زەنگین باسی لەوە کرد کە کۆمیسیۆنی یەکڕیزیی نیشتمانی، برایەتی و دیموکراسی لە پەرلەمان، کە بۆ ئەو مەبەستە پێکهێنراوە، کارەکانی تا کۆتایی ساڵ بەردەوام دەبن. گوتیشی: "دوای پێشکێشکردنی راپۆرتی کۆمیسیۆن، بە ئەگەرێکی زۆر بۆ ئەو کەسانەی تاوانبارن و چەکیان بەکارهێناوە و ئەو کەسانەی چەکیان بەکارنەهێناوە، چەند رێکارێکی یاسایی پێویست دەگیرێتەبەر."

ئەو بەرپرسە باڵایەی ئاکپارتی، هەڵوێستی دەم پارتی لە پرۆسەکەدا بە ئەرێنی وەسف کرد و جەختی لە یەکدەنگیی وتارەکانیان کردەوە.