سه‌رۆكى تیمى پارێزه‌رانى لاهور شێخ جه‌نگى دواى كۆبونه‌وه‌ى له‌گه‌ڵ یه‌كێتیى په‌یامێكى بڵاوكرده‌وه‌

سه‌رۆكى تیمى پارێزه‌رانى لاهور شێخ جه‌نگى په‌یامێكى به‌په‌له‌ بڵاوده‌كاته‌وه‌و ڕایده‌گه‌یه‌نێت، "دواى كۆبوونه‌وه‌م له‌گه‌ڵ یه‌كێتیى بۆ پرسى گیراوانى لاله‌زار، ده‌ركه‌وت كێشه‌كه‌ سیاسییه‌و په‌یوه‌ندیی به‌دادگاوه‌ نییه‌".

بورهان ڕه‌شید گوڵە سەرۆکی تیمی پارێزەرانی داکۆکیکار لەلاهور شێخ جه‌نگی‌و هاوڕێکانی‌و هاوكات سەرۆکی لیستی بەرەی گەل لەسلێمانی له‌گه‌ڵ عه‌تا محه‌مه‌د بەڕێوه‌بەری نوسینگەی جێگری سەرۆک وەزیران لەسلێمانی كۆبوه‌وه‌، دواى كۆبوونه‌وه‌كه‌ش ڕاگه‌یه‌نراوێكى بۆ ڕاى گشتیى بڵاوكرده‌وه‌.

بورهان ڕه‌شید گوڵه‌ نووسیویه‌تى، "سه‌باره‌ت به‌پێویستی ئازادکردنی ئەو پێشمەرگەو سیکوریتیانەی لەڕوداوی لالەزاردا دەستگیرکراون گفتوگۆمان كردو بەڕێزیان بەڵێنی کارئاسانیدا بۆ ئازادکردنیان".

ئه‌وه‌ش هاتوه‌، "دەربارەی ئەو پارەیەی بۆ یانه‌ى نەورۆز تەرخانکرابوو کە شەوی ڕوداوه‌كه‌ دیارنەماوە، بەڕێزیان بەڵێنی بەدواداچونی بابەتەکەیدا، هەروەها بەڕێزیان بەڵێنیدا بەتەرخانکردنی پارچە زەویه‌ك بۆ گەراجی یانەی وەرزشی نەورۆز".

بورهان ڕه‌شید ئاماژه‌ى به‌وه‌داوه‌، "دەربارەی نەگەڕانەوەی موڵک‌و ماڵی کاک حەمە چاوشین، بەڕێزیان بەڵێنی کارئاسانیدا کە بەزوترینکات بگەڕێتەوە بۆ بنەماڵەکەیان، دەربارەی هەندێ کامێراو کەلوپەلی زوم تی ڤی، بەڕێزیان بەڵێنی بەدواداچونیدا".

له‌كۆتایی ڕاگه‌یه‌نراوه‌كه‌یدا، بورهان ڕه‌شید جه‌ختیكردوه‌ته‌وه‌، "ئێمه‌ش له‌كۆبونه‌وه‌كه‌دا ته‌ئکیدمانکردەوە، ڕوداوه‌كه‌ی لالەزار بڕوام نییە بەدادگا چارەسەربکرێت، بەڵکو کێشەیەکی سیاسییە، هه‌ربۆیه‌ به‌دڵنیاییه‌وه‌ پێویستی بەچارەسەری ڕەگ‌و ڕیشەیی هەیە بەمەبەستی ئاشتەواییەکی سەقامگیر".