مالیکی: پیلانێکی گەورە بۆ دواخستنی هەڵبژاردن دانراوە بەڵام شکستی پێدەهێنین

ناوەندی هەواڵ

نوری مالیکی، سەرۆکی هاوپەیمانی دەوڵەتی یاسا  دەڵێت، هەوڵی دواخستنی هەڵبژاردنەکان پیلانێکی گەورەیە و لە دەرەوەی وڵاتەوە بۆی دانراوە.

لە چوارچێوەی بانگەشەی هەڵبژاردندا لە پارێزگای دیوانییە، نوری مالیکی بە لایەنگرانی وت: "هەڵبژاردن ڕۆژێکی گەورەیە لە مێژووی عێراقدا بۆ پاراستنی پرۆسەی سیاسی؛ و ئەرکێکی نیشتمانییە و بناغەی دەوڵەتە، کە دامەزراوە و ئیدارەکان و حکومەتەکان لێیەوە دابەش دەکرێنەوە".

سەرۆکی هاوپەیمانی دەوڵەتی یاسا ئاشکراشی دەکات کە لە ئێستادا "هەوڵ بۆ دواخستنی هەڵبژاردن هەیە و پیلانێکی گەورەیە لە دەرەوەی وڵات بۆی دانراوە".

ڕاشیگەیاندووە، "هەڵبژاردن لە کاتی خۆیدا ئەنجام دەدرێت، چونکە نوێنەرایەتی دیموکراسی دەکەن".

بە وتەی مالیکی، ئەنجامنەدانی هەڵبژاردن بە واتای داڕمانی شەرعیەتی ئەنجومەنی نوێنەران و حکومەتە لەبەرئەوەی "دەستوری عێراق هیچ شتێکی بە ناوی حکومەتی فریاگوزاریی تێدانییە، چونکە بە مانای کەوتنە ناو ئاژاوە دێت."

سەرۆکی هاوپەیمانی دەوڵەتی یاسا جەختیش لەوەدەکاتەوە کە، "عێراق وڵاتێکی گرنگە لە ناوچەکەدا و بۆیە دەکرێتە ئامانج، هەروەها ناتوانین وڵاتەکەمان و سەروەری عێراق ڕادەستی ئەو پلانانە بکەین."