وه‌زاره‌تى ناوخۆ له‌باره‌ى دوو ته‌قینه‌وه‌ ڕوونكردنه‌وه‌ ده‌دات

به‌ناونیشانى لەبەغدا ئاژاوە هەیە، به‌شێك له‌میدیاى عێراق بڵاویانكردووه‌ته‌وه‌، دوو تەقینەوە ماڵی داواکاری گشتی وەزارەتی ناوخۆیان لەبەغدا كردووه‌ته‌ ئامانج، له‌وباره‌یه‌شه‌وه‌ وه‌زاره‌تى ناوخۆ هاته‌ده‌نگ‌و ڕوونكردنه‌وه‌یه‌كى به‌په‌له‌ بڵاوده‌كاته‌وه‌.

له‌ڕاگه‌یه‌نراوێكدا وەزارەتی ناوخۆ ڕایگه‌یاندووه‌، "هەواڵێک سەبارەت بەبەئامانجگرتنی ماڵی داواکاری گشتیی وەزارەتمان بڵاوبووه‌ته‌وه‌، به‌ڵام ده‌مانه‌وێت ئه‌و ڕاستیه‌ بۆ هه‌موولایه‌ك ڕوون بكه‌ینه‌وه‌، ئەو زانیاریانە نادروست‌و بێبنەمان".

وه‌زاره‌تى ناوخۆ ئه‌وه‌شى ڕوونكردوه‌ته‌وه‌، ژماره‌یه‌ك لەماڵپه‌ڕو سۆشیال میدیا هەواڵی دوو تەقینەوەیان بڵاوکردەوە کە ماڵی داواکاری گشتی وەزارەتی ناوخۆی عێراقیان کردووه‌ته‌ ئامانج، به‌ڵام ئه‌و هەواڵە "درۆیه‌".

ئه‌وه‌شى وتووه‌، "داواکاری گشتیی وەزارەتى ناوخۆ بەشێوەیەکی ئاسایی کارەکانی ئەنجامدەدات‌و هیچ ڕووداوێکیش لەنزیكى ماڵه‌كه‌یى‌و ته‌نانه‌ت له‌به‌غداش ڕووینه‌داوه‌".

ئه‌و وەزارەته‌ هۆشداریداوه‌و ده‌ڵێت، "دەزگاکانی ڕاگەیاندن‌و بەکارهێنەرانی سۆشیال میدیا ئاگادارده‌كه‌ینه‌وه‌، وردبن لەڕاپۆرت‌و زانیارییه‌كانیاندا، تەنها لەسەرچاوە فەرمییەکانەوە هەواڵ وەربگرن‌و خۆیان لەبڵاوکردنەوەی هه‌واڵى ناڕاست‌و زیانبەخش بەدووربگرن، چونكه‌ به‌گوێره‌ى یاسا سزای توندی هەیە".