ورده‌كاریى تێكه‌ڵبونى هه‌سه‌ده‌و سوپاى سوریا.. 30% سوپا له‌هه‌سه‌ده‌ پێكدێت

هێزەکانی هەسەدە تێکەڵ بەسوپای سوریا دەکرێن‌و لیستی ناوی فەرماندەی فیرقەکان دراوەتە هاوپەیمانان، لەپڕۆسەکەدا 30%ی ئەرکانی سوپا دەدرێتە هێزە کوردییەکەو لەتەواوی سوریاشدا بوونیان دەبێت.

به‌وته‌ى سەرچاوەیەکی ئاگادار، لەچوارچێوەی پڕۆسەی تێکەڵکردنی شەڕڤانان بەسوپای سوریا، هێزەکانی سوریای دیموکرات لیستی فەرماندەکانی ئەو فیرقە سەربازییانەی پێشکەش بەهاوپەیمانی نێودەوڵەتی دەکات کە دەخرێنە ناو سوپای سوریاو لیوا تایبەتەکان‌و نوێنەرانیان لەنێو وەزارەتی بەرگریی‌و ئەرکانی گشتیی سوریا.

بەپێی زانیارییەکان، ئەو لیستەی هەسەدە دەیداتە هاوپەیمانان، ناوی 70 فەرماندەی تێدایەی کە بەشداریی ڕاستەوخۆیان لەشەڕی تیرۆری داعشدا کردوە.

فەرماندەکانی ئەو سێ فیرقە سەربازییەی کە دەخرێنە ناو سوپای سوریاوە، فەرمانداری ناوچەکانی جەزیرەو فوڕات‌و دێرەزوری تێدایە.

هاوکات ئەو لیستە فەرماندەکانی سێ لیوای تایبەتی بۆ ئەرکانی گشتیی تێدایەو 30%ی پۆستەکانی ئەرکانی گشتیی دەدرێتە هێزە کوردییەکەی ڕۆژئاوای کوردستان‌و لیوایەکیان بەهەماهەنگی لەگەڵ هاوپەیمانان تایبەتە بەشەڕی تیرۆرو لەتەواوی سوریا بونیان دەبێت‌و چالاکی دەکەن.