له‌باره‌ى ڕۆژانى پشووى هه‌ڵبژاردنه‌وه‌ ڕوونكردنه‌وه‌ ده‌درێت

کۆمسیۆنی باڵای هەڵبژاردنەکان سه‌باره‌ت به‌ڕۆژانى پشووى تایبه‌ت به‌هه‌ڵبژاردنه‌كان ڕوونكردنه‌وه‌ ده‌دات‌و وتەبێژی کۆمسیۆنه‌كه‌ش زانیاریى زیاتر له‌وباره‌یه‌وه‌ ئاشكراده‌كات.

جومانە غەلای وتەبێژی کۆمسیۆنی باڵای هەڵبژاردنەکانی عێراق لەلێدوانێكی ڕۆژنامەوانیدا ڕایگەیاند، کۆمسیۆن بەرپرسیار نییە لەپێدانی پشوو بەقوتابخانەکان، بەڵکو ئەوە لەدەسەڵاتی ئەنجومەنی وەزیراندایە.

وتیشى، "هەماهەنگینان لەگەڵ وەزارەتی پەروەردە کردووە بۆ ئەوەی لە 5ـی مانگی داهاتوودا تا 13ـی مانگ، ژمارەیەك لەقوتابخانەکانی لێ وەربگرێت بۆ ئەوەی وەك بنكەی دەنگدان بەكاربهێندرێن".

ئه‌وه‌شى ڕوونكرده‌وه‌، "کۆمسیۆن وەزارەتی پەروەردەی ئاگاداركردووەتەوە کە پێویستی بەژمارەیەک قوتابخانەیە نەوەك هەموویان‌و لەدەسەڵاتیاندا نییە پشووی فەرمی لەقوتابخانەکاندا ڕابگەیەنێت، بەڵکو بابەتەکە تایبەتە بەئەنجومەنی وەزیرانی عێراق".

له‌لایه‌كى دیكه‌وه‌ عیماد جەمیل سەرۆکی تیمی ڕاگەیاندنی کۆمسیۆن ئاماژەی بەوەکردووە، کە پشووی هەڵبژاردن لەسەرەتادا هەینی تا سێشەممە دەبێت، واتە بۆ ماوەی پێنج ڕۆژو ئەگەری درێژكردنەوەی بۆ ماوەی هەفتەیەكی تەواو لەدەسەڵاتی ئەنجومەنی وەزیرانی عێراقدایە.