دواى زیاتر له‌دوو ساڵ یه‌كه‌م فڕۆكه‌ له‌ئیسته‌نبوڵه‌وه‌ به‌ره‌و سلێمانى ده‌فڕێت

دوای زیاتر لەدوو ساڵ سەپاندنی قەدەغەی گەشت لەفڕۆکەخانەی سلێمانییەوە بۆ تورکیا، بەرەبەیانی سبەی دووشەممە یەکەم فڕۆکەی هێڵی ئاسمانی (تورکیش ئێرلاین) لەفڕۆکەخانەی سلێمانی دەنیشێتەوە.

داخستنی گەشتەکانی فڕۆکەخانەی سلێمانی بەڕووی هێڵی ئاسمانی تورکیا، یەکێکبوو لەلێکەوتەکانی شەڕی نێوان پەکەکەو تورکیا، بەڵام دوای دەستپێکردنی پرۆسەی ئاشتی‌و کۆبوونەوەی نێچیرڤان بارزانی سەرۆکی هەرێمی کوردستان لەگەڵ ئەردۆغان، بڕیاردرا قەدەغەی گەشتەکانی تورکیا لەسەر فڕۆکەخانەی سلێمانی هەڵبگیرێت.

به‌گوێره‌ى زانیاریه‌كانى شارپرێس، ئەمشەو کاتژمێر 10:30 فڕۆکەکە لەئیسته‌نبووڵەوە دەفڕێت، کاتژمێر 1:10ی بەرەبەیان دەگات‌و هەمان فڕۆکە کاتژمێر 2:40 دەفڕێتەوە بەرەو ئیسته‌نبووڵ.

ئه‌وه‌ش زانراوه‌، بەپێی ئەو پلانەی دانراوە هەفتانە چوار گەشت لەنێوان سلێمانی‌و تورکیا ئەنجامدەدرێت‌و پلان هەیە ژمارەی گەشتەکان زیاتریش بكرێت.

تورکیا لەڕۆژى 3ى 4ى 2023وه‌ قەدەغەیکرد هیچ فڕۆکەیەک لەفڕۆکەخانەی سلێمانییەوە بچێتە وڵاتەکەیی‌و هەر شەش مانگ جارێکیش ئەو قەدەغەیەی نوێدەکردەوە. بەو هۆیەوە زیانێکی زۆر بەکەرتی ئابووری تورکیاو عێراق‌و هەرێمی کوردستان کەوت، ئێستاش بەدەستپێکردنەوەی گەشتەکان چاوەڕێدەکرێت جوڵەی ئابووریی لەسلێمانی بەهێزتربێت.

ئەمشەو گەشتەکە لەفڕۆکەخانەی ئیسته‌نبووڵەوە بەکۆدو ژمارەی TRY13,925 دەستپێدەکات، بەهۆی ئەوەی هێشتا دەرفەت بۆ فرۆشتنی تکتی گەشتەکە ماوە، بۆیە ژمارەی سەرنشینان گۆڕانکاریی لێ بەسەردێت.