دیمه‌شق هه‌ڕه‌شه‌ له‌كورد ده‌كات

نەجیب غەزبان بەڕێوەبەری ناوەندی لێکۆڵینەوەی ستراتیژی لەوەزارەتی دەرەوەی سوریا ئاشكرایكرد، پەیوەستنەبوونی سوریا بەهاوپەیمانی دژی داعشەوە تائێستا پەیوەندیی بەپێکهاتەو ڕۆڵی هێزەکانی سوریای دیموکراتەوە هەیە.

غەزبان لەلێدوانێکدا دەڵێت، "یەکێک لەو هۆکارانەی کە ڕێگریی لەسوریا کرد زووتر پەیوەندیی بەهاوپەیمانی دژ بەداعشەوە بکات، بوونی کێشە چارەسەرنەکراوەکانە کە پەیوەندییان بەپێکهاتەکانی فەرماندەیی‌و ڕۆڵی هێزەکانی هەسەدەوە هەیە".

ڕۆژی شەممە تۆماس باراک نێردەی تایبەتی ئەمریکا لەسوریا ئاشکرایکرد، سوریا نزیکە لەپەیوەندیکردن بەهاوپەیمانی نێودەوڵەتی‌و بڕیارە ڕۆژی 10ی ئەم مانگە ئەحمەد شەرع سەرۆکی سوریا سەردانی واشنتۆن بکات بۆ واژۆکردنی ڕێککەوتنی پەیوەستبوون بەهاوپەیمانی نێودەوڵەتی.

غەزبان ڕوونیشیکردەوە، حکومەتی سوریا درک بەوە دەکات کە "پێشکەوتن بەبێ ئاڕاستەکردنی ئەو بەشەی وڵات ناکرێت"، بەئاماژەدان بەو ناوچانەی کە لەلایەن هێزەکانی سوریای دیموکراتەوە کۆنتڕۆڵکراون.

هۆشداریشیدا لەوەی، "ئەگەر ڕێککەوتنێک نەکرێت، گرژییە بنەڕەتییەکانی نێوان دیمەشق‌و کورد ڕەنگە پەرە بسێنێت".