عێراق وه‌ڵامێكى توندى ئێران ده‌داته‌وه‌

وەزارەتی دەرەوەی عێراق وەڵامێكى توندى لێدوانەكانی وتەبێژی وەزارەتی دەرەوەی ئێرانی دایەوە كە سەبارەت بەهەڵبژاردنی په‌رله‌مانى عێراق قسەیكردبوو.

لەڕاگەیەنراوێكی وەزارەتی دەرەوەی عێراقدا هاتووە، "وەزارەتەكەمان بەدواداچوونی بۆ وتەكانی ئیسماعیل بەقایی وتەبێژی وەزارەتی دەرەوەی ئێران كردووە كە سەبارەت بەپڕۆسەی هەڵبژاردن لەعێراق قسەیكردبوو".

هەروەها هاتووە، "تووشى سەرسوڕمان بووین بەو لێدوانانە كە بەدەستوەردانێكی ڕوون‌و قبووڵنەكراوی دەزانین لەكاروباری ناوخۆی عێراقدا، بەلەبەرچاوگرتنی ئەوەی کە پرۆسەی هەڵبژاردن بابەتێکی تەواو نیشتمانییەو تایبەتە بەئیرادەی گەلی عێراق‌و دامەزراوە دەستوورییەکان".

لەڕاگەیەنراوەكەدا ئاماژە بەوەشدراوە، "عێراق پەیوەندییەكی هاوسەنگ لەگەڵ سەرجەم دراوسێکانی هەیە لەسەر بنەمای سەروەریی‌و ڕێزگرتنی یەکترو هەروەها دەستوەرنەدان لەکاروباری ناوخۆدا".

ئیسماعیل بەقایی وتەبێژی وەزارەتی دەرەوەی ئێران ئەمڕۆ دووشەممە لەكۆنگرەیەكی ڕۆژنامەوانیدا هەڵبژاردنەكانی عێراقی بەوێستگەیەكی چارەنووسساز وەسفكردبوو و هۆشداریشیدابوو لەهەر دەستوەردانێك لەپڕۆسەكەدا.

ئیسماعیل بەقایی ڕایگەیاندبوو، ئێران‌و گەلی عێراق‌و وڵاتانی ناوچەكە بەگشتیی هەموو جۆرە دەستوەردانێكی نێودەوڵەتی لەهەڵبژاردنەكانی عێراق رەتدەكەنەوە.

وتەبێژی وەزارەتی دەرەوەی ئێران وتبووی، لەڕابردوودا سەلمێنراوە هەموو دەستوەردانێكی ئەمریكی لەکاروباری ناوخۆی وڵاتانی دیکەدا، لێکەوتەی نەرێنی بۆ ئاشتی‌و سەقامگیریی ئەو وڵاتانەو تەواوی ناوچەکە لێدەكەوێتەوە.