چین‌و ئەمریکا چەند زۆنێکی ئابووری لەکوردستان دروستدەکەن

لەهەرێمی کوردستان ئامادەکاریی دەکرێت بۆ دروستکردنی چەند ناوچەیەکی ئابووری کە یارمەتیدەر دەبێت بۆ ڕاکێشانی زیاتری وەبەرهێنەرانی نێودەوڵەتیی‌و زیادکردنی داهات بۆ هەرێم. 

د. محەممەد شوکری سەرۆکی دەستەی وەبەرهێنان لەگەڵ شاندێکی دامەزراوەی پلاندانان‌و پەرەپێدانی هەرێمی (RDI)ی چینی کۆبووەوە کە لەبوارەکانی پەرەپێدانی ئابوری کاردەکات، مەبەست لەکۆبوونەوەکە دروستکردنی چەند زۆنێکی ئابوورییە لەکوردستان.

بەرگەشت ئاکرەیی وتەبێژی دەستەی وەبەرهێنان ڕاگەیاند، دامەزراوەی پلاندانان‌و پەرەپێدانی هەرێمی (RDI)ی چینی بەهەماهەنگی لەگەڵ بانکی دارایی نێودەوڵەتی IFC چەند زۆنێکی ئابووری لەهەرێمی کوردستان دروستدەکەن.

وتەبێژی دەستەی وەبەرهێنان ڕوونیدەکاتەوە، دروستکردنی ئەم زۆنانە یارمەتیدەر دەبێت لەڕاکێشانی وەبەرهێنەرو وەبەرهێنانی بیانی بۆ هەرێمی کوردستان، هەروەها لەو ڕێگەیەوە پارەیەکی زیاتر دێتە هەرێمی کوردستان.

دامەزراوەی (RDI) لەبوارەکانی پەرەپێدانی ئابووری، پلاندانانی پیشـەسازیی‌و ڕاوێژکاری داڕشتنی سیاسەت کاردەکات‌و بارەگاکەی لەچینە، هاوکات دامەزراوەی دارایی نێودەوڵەتی (IFC) بۆ توێژینەوە کاردەکات، بارەگاکەی لەئەمریکایە، دەستەی وەبەرهێنان دوێنێ لەگەڵ هەردوو شاند کۆبووەتەوە.