لە48 کاتژمێری داهاتوودا داهاتی ناوخۆ بۆ بەغدا دەنێردرێت‌و مووچەی مانگی نۆ دێت

مووچەخۆرانی هەرێم لەچاوەڕوانی ناردنی مووچەی مانگی نۆدان، بەرپرسێکی باڵای حکومەتی کوردستانیش لەوبارەیەوە ده‌ڵێت، لەدوو ڕۆژی داهاتوودا 120 ملیار دیناری داهاتی ناوخۆ بۆ بەغدا دەنێردرێت، هەفتەی داهاتووش بەغدا مووچەی مانگی نۆ دەنێرێت.

ئەمڕۆ دووشەممە کۆبوونەوەی ئەنجوومەنی وەزیرانی عێراق بەسەرپەرشتی سوودانی‌و ئامادەبوونی تەیف سامی وەزیری دارایی عێراق بەڕێوەچوو، بەڵام پرسی ناردنی مووچەی فەرمانبەرانی هەرێم باسنەکرا، هەرێمی کوردستانیش تائێستا داهاتی ناوخۆی بۆ بەغدا نەناردووە.

سەرەتاى هەفتەی داهاتوو دابەشکردنی مووچەی فەرمانبەرانی عێراق دەستپێدەکات، دوای ئەوەی تا ناوەڕاستی هەفتە مووچەی چەند وەزارەتێک دابەشکرا، ئینجا مووچەی مووچەخۆرانی هەرێمی کوردستان دەنێردرێت.

بەرپرسێکی باڵای حکومەتی عێراق لەوبارەیەوە ڕایگەیاند، هەفتەی داهاتوو دوای ئەوەی حکومەتی عێراق دەستی بەدابەشکردنی مووچەی فەرمانبەرانی خۆی کرد، هی هەرێمی کوردستانیش دەنێرێت.

بەرپرسێکی باڵای حکومەتی هه‌رێمیش وتوویه‌تى، "لەدوو ڕۆژی داهاتوودا 120 ملیار دیناری داهاتی ناوخۆ بۆ بەغدا دەنێردرێت، هەفتەی داهاتووش بەغدا مووچەی مانگی نۆ دەنێرێت".