دیواری قوتابخانەیەك ڕووخاو دوو قوتابی بوونە قوربانی

ئەمڕۆ دیواری یەكێك لەقوتابخانەكانی شارى بەغدا ڕووخاو بەهۆیەوە دوو قوتابی منداڵ بوونە قوربانی، وەزارەتی پەروەردەی عێراقیش لیژنەیەكی لێكۆڵینەوەی باڵاو بەپەلەی لەسەر ڕووداوەكە پێكهێنا.

دوای نیوەڕۆی ئەمڕۆ چوارشەممە لەقوتابخانەی قدووس لەشارەدێی یوسفییە لەباشووری بەغدا، دیواری یەكێك لەپۆلەكان ڕووخا، سه‌رچاوه‌كانیش ده‌ڵێن، "به‌هۆى ڕووداوەكەوه‌، منداڵێكی قوتابی گیانی لەدەستداو یەكێكی دیكەش بەسەختی برینداربوو".

ئیبراهیم نامس جبووری وەزیری پەروەردەی عێراق لەڕووداوەكە ئاگاداركرایەوەو ئەویش بڕیاریدا لیژنەیەكی باڵای هونەری پێكبهێنێت بۆ ئەوەی لەماوەی 24 كاتژمێردا ڕاپۆرتێك لەسەر هۆكاری كەوتنەوەی ڕووداوەكە ئامادەبكەن.

هەر لەسەر ڕووداوەكە، وەزیری پەروەردە بڕیاریدا چیتر ڕێگەنەدرێت بەدروستكردنی باڵەخانەو پۆلی زیادە لەقوتابخانەكان بەبێ وەرگرتنی ڕەزامەندی لایەنی پەیوەندار بەمەبەستی سەلامەتی گیانی قوتابییان لەسەرتاسەری عێراق.