ڕۆژى هه‌ینى ڕوداوێكى گرنگ له‌توركیا ڕووده‌دات

عەلی باباجان سەرۆکی گشتیی پارتی داوا، لەکۆبونەوەی هەفتانەی ''یەنی یۆڵ''دا قسەیکردو بانگی لەئەردۆغان کرد کە سەردانی ئیمڕاڵى بکات‌و بەرپرسیارێتی گەشەسەندی پڕۆسەی ئاشتی لەتورکیادا بگرێتە ئەستۆ.

باباجان وتی، "کاتی ئەوە هاتوە ئەردۆغان‌و حزبەکەی بەشێوەیەکی ڕاشکاوانە بەرپرسیارێتییەکانی ئەم پڕۆسەیە بگرنە ئەستۆ".

هاوکات لەگەڵ ئەم قسانەی عەلی باباجاندا، فەتحی یه‌ڵدز جێگری سەرۆکی مەهەپە لەئەکاونتی خۆی لەسۆشیاڵ میدیادا ڕایگەیاند، "شاندێکی کۆمسیۆن دەچنە دورگەی ئیمڕاڵی لەگەڵ عەبدوڵڵا ئۆجەلاندا کۆدەبنەوە".

وتووشیه‌تى، "ڕۆژی هەینی واتە 21ی ئەم مانگە کۆمسیۆنی هاوپشتی نیشتمانی، برایەتی‌و دیموکراسی، بڕیاری چون بۆ دورگەی ئیمڕاڵی دەدات‌و شاندەکە پێکدێت لەیەک ئەندام پەڕلەمانی هەر لایەنێک کە لەکۆمسیۆنەکەدا جێگەدەگرێت".

ئاماژەی بەوەشداوه‌، هەر لایەنێک کە نایەوێت نوێنەری خۆی بۆ شاندەکە بنێرێت پێویستە بەئاشکراو بەڕونی ئەم بابەتە بۆ ڕای گشتیی تورکیا بڵاوبکاتەوە.

چاودێران بڕیاره‌كه‌ى كۆمسیۆنى په‌رله‌مان، به‌ڕوداوێكى مێژویى ناوده‌به‌ن‌و پێیانوایه‌، سه‌ردانى كۆمسیۆنه‌كه‌ى په‌رله‌مان‌و كۆبونه‌وه‌و دیدارى ڕاسته‌وخۆیان له‌گه‌ڵ ئۆجه‌لان به‌هه‌نگاوێكى گرنگ‌و مێژویى ناوده‌به‌ن.