حزبی دەعوە بە فەرمی نوری مالکی بۆ سەرۆک وەزیران کاندید دەکات

ئیرادە میدیا

حزبی دەعوەی ئیسلامی بە فەرمی ڕایگەیاند کە ئەندامانی ئەنجومەنی شورای حزب بە کۆی دەنگ، بڕیاریان داوە کە نوری مالکی، ئەمینداری گشتیی حزبەکە و سەرۆک وەزیرانی پێشوو، وەک کاندیدی فەرمی و تاکەکەسی خۆیان بۆ پۆستی سەرۆک وەزیرانی حکومەتی داهاتوو دیاری بکەن.

چاودێران پێیان وایە مالکی، کە هاوپەیمانییەکەی بە 29 کورسی پلەی سێیەمی بەدەست هێناوە لەنێو پێکهاتەی شیعەدا، لە ڕێگەی کاندیدکردنی خۆیەوە هەوڵ دەدات سەرکردایەتی بڕیاری چوارچێوەی هەماهەنگی بکات و فشار دروست بکات بۆ ئەوەی دووبارە نەهێڵێت سوودانی بۆ خولێکی دیکە بگەڕێتەوە، لە کاتێکدا هەردوولا بانگەشەی پێکهێنانی گەورەترین کوتلە دەکەن.

بۆ ئەوەی مالکی سەرکەوتوو بێت، پێویستە پشتگیری تەواوی چوارچێوەی هەماهەنگی بەدەست بهێنێت، پاشان سازان لەگەڵ پارتی دیموکراتی کوردستان** (36 کورسی) و هاوپەیمانی تەقەدووم (36 کورسی) بکات بۆ کۆکردنەوەی زۆرینەی پێویست (165 کورسی) بۆ پێکهێنانی حکومەت.