له‌باره‌ى كاندیدبوونى بافڵ تاڵه‌بانى بۆ پۆستى سه‌رۆك كۆمار یه‌كێتیى ڕوونكردنه‌وه‌ ده‌دات

ئەندامێکی مەکتەبی سیاسیی یەکێتیی ڕایده‌گه‌یه‌نێت، پەیوەندییەکانی نێوان پارتی‌و حزبەکەی باشە، ده‌شڵێت، "بەدڵنیاییەوە کۆبوونەوەش دەکرێت"، لەبارەی کاندیدکردنی بافڵ تاڵەبانی بۆ پۆستی سەرۆک کۆمار ڕوونكردنه‌وه‌ ده‌دات.

یەک ساڵ‌و یەک مانگ بەسەر هەڵبژاردنی پەرلەمانی کوردستان تێپەردەبێت، بەڵام تائێستا نەتوانراوە کابینەی نوێی حکومەت پێکبهێنرێت، پارتی دیموکراتی کوردستان وەک براوەی یەکەمی هەڵبژاردنەکە جەخت لەوەدەکاتەوە، لەبابەتی پێکهێنانی کابینەی نوێی حکومەت نەرمیی زۆریان بەرامبەر یەکێتیی نواندووە، بەڵام لەدوای هەڵبژاردنی پەرلەمانی عێراق بەپێی بەرکەوتەی خۆیان مامەڵە لەگەڵ یەکێتیی دەکەن.

له‌وباره‌یه‌وه‌ سەعدی ئەحمەد پیرە، ئەندامی مەکتەبی سیاسیی یەکێتیی نیشتیمانی کوردستان دەربارەی پەیوەندیی نێوان پارتی‌و یەکێتیی دەڵێت، "پەیوەندییەکانی نێوانمان باشەو بەدڵنیاییەوە کۆبوونەوەش دەکرێت".

دەربارەی دەنگۆی کاندیدکردنی بافڵ تاڵەبانی بۆ وەرگرتنی پۆستی سەرۆک کۆماری عێراق، سەعدی پیرە وتی، "گفتوگۆ لەسەر ئەو بابەتە نەکراوەو هیچ پێشنیازێکی واش نییە، بەڵکو ئەم بابەتە تەنها لەمیدیاکانه‌وه‌ بیستوومانە".