پڕۆژه‌ى ڕووناكى له‌هه‌ولێر كێشه‌ى تێكه‌وت‌و وه‌زاره‌تى كاره‌با ڕوونكردنه‌وه‌ ده‌دات

وەزارەتی کارەبا ڕوونکردنەوە ده‌دات سه‌باره‌ت به‌پچڕانی تەزووی کارەبا لەگەڕەکێکی شاری هەولێر، ده‌شڵێت، "هۆکارەکەی بۆ پرۆسەی چاکسازیی‌و نۆژەنکردنەوەی تۆڕەکان دەگەڕێنێتەوە".

لەڕاگەیه‌نراوێکدا وەزارەتی کارەبای کوردستان ئاشکرایکرد، لەماوەی 48 کاتژمێری ڕابردوودا بەهۆی ئەنجامدانی چالاکییەکانی "سازدانەوەی تۆڕی کارەبا"، بەشێک لەدانیشتووانی گەڕەکی (فەرمانبەران)ی شاری هەولێر تووشی پچڕانی کارەبا بوونەتەوە".

وەزارەتەکە ڕوونیکردووەتەوە، ئەم هەنگاوە بەشێکە لە پلانی پێشوەختەیان بۆ نۆژەنکردنەوەی گۆڕەرەکان (محاویلەکان)و تۆڕی کارەبای نیشتمانی، بەئامانجی چارەسەرکردنی گرفتە تەکنیکییەکان‌و کەمکردنەوەی پچڕانی کارەبا لەداهاتوودا.

سەبارەت بەکاتی چارەسەرکردنی گرفتەکە، وەزارەتی کارەبا ڕایگەیاندووە، "لەئێستادا تیمەکانی وەزارەت بەهەماهەنگی لەگەڵ تیمەکانی پڕۆژەی (ڕووناکی)، سەرقاڵی کارکردن بۆ گەڕاندنەوەی تەزووی کارەبان بۆ هاوڵاتییانی گەڕەکی فەرمانبەران".

لەبەشێکی دیکەی ڕاگەیه‌نراوەکەدا، داوا لەهاوڵاتیان کراوە "بەردەوام چاودێریی نامەکانی مۆبایلیان بکەن، تاوەکو لەکات‌و شوێنی ئەنجامدانی کارەکانی سازدانەوە لەناوچەکانیان ئاگاداربن".

وەزارەتی کارەبا وێڕای بەرزنرخاندنی پشوودرێژیی‌و هاوکاریی هاوڵاتیان، ئاماژەی بەوەداوە، بۆ هەر پرسیارو زانیارییەک هاوڵاتیان دەتوانن پەیوەندیی بەهێڵی گەرمی ژمارە (1992)ەوە بکەن.