مه‌ترسیى بڵاوبوونه‌وه‌ى په‌تایه‌كى فراوان ده‌كرێت‌و ده‌وامى قوتابخانه‌كان ڕاده‌گیرێن

میدیاکانی ئێران بڵاویانکردەوە، بەهۆی زیادبوونی ڕێژەی پیسبوونی هەواو بڵاوبوونەوەی پەتای ئەنفلوەنزا، لیژنەی فریاگوزاریی پیسبوونی هەوا بڕیاریداوە دەوامی خوێندنگەو زانکۆکان لەچەندین پارێزگا ڕابگرێت یان بیکاتە ئۆنلاین.

بەگوێرەی بڕیارەکە، لەپارێزگای تاران (جگە لەشاری فیروزکوه)، ڕۆژانی سێشەممەو چوارشەممە خوێندنی قوتابخانەو زانکۆکان بەشێوەی ئۆنلاین دەبێت.

هەروەها بانکەکان بەشێوەی ئێشکگر دەبن‌و فەرمانبەرانی فەرمانگە حکومی‌و ناحکومییەکانیش بەڕەزامەندیی بەڕێوەبەرەکانیان دەتوانن لەماڵەوە کارەکانیان ڕایی بکەن.

هاوکات، لەهەریەک لەپارێزگاکانی یەزد، ورمێ، سیستان‌و بەلووچستان‌و ئەلبورز، دەوامی قوتابخانەو زانکۆکان کراوەتە ئۆنلاین‌و لەپارێزگای قەزوێنیش قوتابخانەکان بەتەواوی داخراون.

هۆکاری سەرەکیی ئەم بڕیارانە بۆ تەشەنەسەندنی ئەنفلوەنزاو پیسبوونی مەترسیداری هەوا دەگەڕێتەوە.

پێشتریش دەزگای کەشناسیی ئێران هۆشداریی توندی دابوو له‌دۆخی هەوای زۆربەی شارەکان‌و ڕایگه‌یاندبوو، زۆر ناتەندروسته‌ بۆ هاووڵاتییان.