یەكگرتوو داواى كۆبوونه‌وه‌ى به‌په‌له‌ى لایه‌نه‌كان ده‌كات

یەكگرتووی ئیسلامی كوردستان دەستپێشخەرییەك پێشكەش بەلایەنە براوەكانی هەڵبژاردنی په‌رله‌مانى عێراق لەهەرێمی كوردستان دەکات.

د. سەڵاحەدین بابەكر وتەبێژی یەكگرتووی ئیسلامی ئاشكرایكردووه‌، لەڕوانگەی بەرپرسیارێتی نیشتیمانی‌و هەستیاری بەهێزكردنی پێگەی هەرێم‌و خزمەتكردنی هاوڵاتیان هەرێم‌و چارەسەركردنی كێشە كەڵەكەبووەكانی نێوان هەرێم‌و عێراق، یەكگرتووی ئیسلامی، داوای كۆبوونەوەیەكی هاوبەش لەسەر ئاستی مەكتەبی سیاسی لایەنە براوەكانی هەڵبژاردن‌و پێكهێنانی لیژنەیەكی باڵا بۆ داڕشتنی نەخشەڕێگایەك بۆ چۆنێتی گفتوگۆكردن‌و پاراستن‌و دابینكردنی دەستكەوتەكان‌و بەدەستهێنانی بەركەوتەكانی هەڵبژاردن‌و مافە ڕەواكانی هەرێم دەکات".

ئه‌وه‌شى ڕوونكردووه‌ته‌وه‌، "لەنەخشەڕێگاكەدا هێڵە سوورەكانی هەرێم وەك (موچە، بودجەو ماددەی 140و یاسای نەوت‌و غازو پێشمەرگە) دیاریکراون‌و  بەمەرجگیراون بۆ پاڵپشتیكردن‌و دەنگدان بەسەرۆك وەزیرانی داهاتووی عێراق".

د. سەڵاحەدین بابەكر وتەبێژی یەكگرتووی ئیسلامی ئاماژەی بەوەشكرد، یەكگرتوو تەئكید دەكاتەوە كە پێویستە ئەوپەری هەوڵبدرێت بۆ گێڕانەوەی سەرجەم شایستە داراییەكانی هاوڵاتیانی هەرێمی كوردستان.